VALPARAISO, Chile – E catastrofe a golpia Valparaiso, na e costa di Chile.
E vlamnan di un feros incendio forestal cu a cuminsa dialuna, a distrui por lo menos 100 vivienda, lagando decenas di famia damnifica y por lo menos 19 herido.
Mey mey di e decenas di e tragico imagennan di e destruccion, tabata tin uno cu a bira viral y a conmove e usarionan di e rednan social.
Ta trata aki di un foto di un bombero boluntario di Valparaiso, cu segun e cuenta di Twitter di Bomberos de Chile, a yora mientras el a wak con e vlamnan tabata consumi su cas dialuna, pero el a sigui traha.
Segun e mensahe ta trata di un boluntario di e compania 16.
E bomberonan di Valparaiso tambe a manda un mensahe, reconociendo su labor.
E imagen a wordo capta pa e fotografo Fidel Patricio Rudolffi, kende riba su pagina di Facebook a identifica e bombero como Juan Carlos Espinoza Avarias.
Den e perfil cu el a saca, ta vincula den su publicacion, por a mira un imagen di Espinoza y e ultimo publicacion ta di dialuna.
“Mi tabata combatiendo e candela di un otro cas y mira e vlamnan den mi cas tabata fuerte, pero mi a sigui traha, ta loke mi por, mi no por haci nada otro cu traha,” bombero Espinoza a bisa den un entrevista cu e periodista Gonzalo Perez.
“Aunke bo ta den e ultimonan, tin cu sigui sirbi,” Espinoza a añadi na e radio, kende a bisa cu e tabata trahando como un salbabida riba beach, ora cu el a mira un columna di huma y a dirigi pa traha, pero el a afirma “nunca mi a imagina cu lo ta mi cas.”
Riba su perfil di Facebook, Espinoza a ricibi cientos di comentario di animo y admiracion pa su fortalesa den momentonan tragico.
E bomberonan, e Armada Chileno, Ehercito y e Carabineros di e pais aki a uni esfuersonan desde dialuna atardi pa paga e vlamnan di e candela cu a laga por lo menos 100 cas distrui y 19 herido.
Fuente: CNN en Español