Internacional: Un Boeing 737 cu tabata transportando mas di 60 persona, di cual 56 ta pasahero -inclui tres baby y shete mucha- y seis tripulante, a disaparce awe diasabra riba laman di Java, despues di a cay poco despues di a sali for di Yakarta.
E vuelo di Sriwijaya Air, e SJY182, a sali awe diasabra for di e Capital di Indonesia y tabata bayendo Pontianak, den e provincia di Kalimantan Occidental, ora cu el a perde contacto cu sala di control, segun a keda publica den medionan local.
Ta sospecha cu e avion, un Boeing B737-500, a cay 10.000 pia (mas o menos 3 kilometer) den menos di 60 seconde, solamente 4 minuut despues di a despega.
E avion desapareci, cu number di registro PK-CLC (MSN 27323), tin 26 aña di servicio y a efectua su prome vuelo na mei 1994, segun a keda raporta pa Flightradar24. Despues a agrega: “Nos ta siguiendo e informenan di e desaparicion di un Boeing 737-500 na Indonesia. Nos ta spera di por tin mas informacion pronto”.
E aeroliña Indones Sriwijaya ainda no a emiti declaracion algun.
Adita Irawati, vocero di e Ministerio di Transporte Indones, a afirma: “A perde contacto cu un avion di Sriwajaya durante su ruta di Yakarta pa Pontianak cu e codigo di yamado SJY 182. E ultimo contacto a keda produci pa 14:40 (ora local, 6:40 GMT). Nos lo proporciona mas informacion segun cu esaki yega na nos”.
Di su banda, Gobernador di e Islanan Seribu, cercano na e punto unda cu a perde contacto cu e aparato, a declara cu e habitantenan di e lugar lo a scucha un explosion na mes momento, segun declaracionan di e website local Detik, y piscadornan den cercania a afirma na medionan local cu nan a presencia un explosion y lo a haya ta drief riba lama e posibel restonan di un accidente aereo cu autoridadnan ainda no a confirma.
Agencia di Indonesia di buskeda y rescate, Basarna, ya caba a manda un ekipo na e zona, segun a keda informa pa e medio local Kompas.
Na October 2018, 189 persona a muri ora cu un avion Lion Air Boeing 737 MAX a accidenta den e Laman di Java mas o menos 12 minuut despues di a sali for di Yakarta den un vuelo di rutina di 1 ora.
E accidente aki, y uno su tras cu tambe tabata mortal na Etiopia, a pone cu Boeing a haya un multa di 2500 miyon dollar pa acusacionnan di a defrauda e reguladornan cu tabata supervisa e model 737 MAX, cu ta grounded mundo despues di e dos accidente mortal aki.