LONDON, Gran Britania- E ultimo apuesta di e Proem Minister Britanico, Theresa May, pa yega na un solucion satisfactorio pa Brexit a wak esaki faya diaranson ora cu parlamentarionan di su mesun partido a rechasa su proposicion y a pidi su retiro di inmediato.
Casi tres aña despues di cu 52% di e votadonan di Reino Uni a mustra di ta na fabor di bandona Union Europeo, esaki ta e ultimo intento di May pa su acuerdo di divorcio wordo aproba pa parlamento Britanico prome cu final di su mandato, cu tabata marca pa Brexit.
Un biaha mas May a haci un yamada na parlamentarionan pa apoya su proposicion, cu ta ofrece como incentivo un di dos referendum pa cu Brexito y lasonan comercial mas estrecho cu UE.
Pero e rechaso tabata brutal. Tanto parlamentarionan Laborista como conservadornan a critica e proyecto riba e ley di acuerdo di retiro, of WAB, cu ta implementa e terminonan di e salida di Reino Uni for di e blok comercial mas grandi di mundo.
Algun di nan tabata promove cu hopi clamor e retiro di May y tabata tin informenan di cu algun minister di su mesun gabinete lo por bira contra di dje.
“Tin un ultimo oportunidad di haci’e bon y sali di manera ordena. Pero awo ta momento pa Prome Minsiter THeresa May bay y sin mas tardansa”, e parlamentario conservador Tom Tugendhat den e Financial Times. Tugendhat ta e presidente di e Comite di Asuntonan Exterior di Parlamento.
“E mester haci esaki prome cu e eleccionnan parlamentario Europeo di diahuebs”, el a agrega.
E dead end na London ta cu no tin claridad di ni con ni ki ora Reino Uni lo bandona UE, na cual el a uni na 1973. Tampoco tin claridad si finalmente e lo yega na haci esaki. E fecha limite pa su salida ta 31 di october.
E ultimo oferta di May a traha ariba nervio di esunnan cu ta opone na un di dos referendum, y no tabata suficiente pa esunnan cu kier duna e votadonan un di dos oportunidad cu e speransa di stop Brexit por completo.
A pesar di e criticanan, May a mantene su mes firme durante mas di dos hora di pregunta den Parlamento, urgiendo parlamentarionan pa apoya e proyecto di ley, y despues lo tin chens pa haci cambionan, pa nan tin mas control ariba e aspecto final di Brexit.
“Cu tempo, otro Prome Minister lo ta akinan”, May a bisa, reconociendo cu su liderazgo tabata yegando su fin.
“Pero mientras cu ami ta akinan, mi tin e deber di ta duidelijk cu e House of Commons riba e hechonan. Si nos ta bay tin un Brexit den e Parlamento aki nos lo mester aproba e ley di acuerdo di retiro”, May a bisa.