Diamars, pa mas of menos 11’or di anochi, coleganan di Maritiem Politie a meld cu via radar un boto a wordo señala cu posiblemente lo a drenta na altura di “Santana di Cacho” na Sero Colorado. A base di esaki, dos unidad di San Nicolas a bay na dicho luga.
Eynan a bin resulta cu e caso ta asina, caminda cu nan a haya un boto ilegal cu un cierto cantidad di persona aden. Alabes, mirando un boto di kustwacht, cu tabata bezig ta atendiendo e personanan, a trece esaki na canto.
E boto ilegal yama Amuay Mar Ammt y a mara na e pier di Marinierskazerne na Savaneta. Den e boto tabata tin e capitan, un matroos y 18 hende homber, haciendo un total di 20 persona.
E capitan JLBR y e matroos CJM a wordo deteni pa e kwartier meester di kustwacht a base di traficacion di hende.
E otro 18 personanan a wordo deteni. E capitan y matroos a wordo hiba warda di polis na San Nicolas, caminda cu nan a keda presenta dilanti fiscal auxiliar, pa despues wordo encarcela.
E 8 ilegal a keda deteni na warda di San Nicolas y e otro 10nan a bay na e edificio di Warda nos Costa na Dakota. Autoridadnan necesario a wordo poni na altura di un ke otro.