Diaranson anochi, un biaha mas, azeta tira den riool ta pone cu e parti di Palm Beach a hay’e confronta cu problema, pa cual DOW mester a drenta den accion. Sr. Marlon Croes, director di DOW ta splica mas di e situacion aki.
DOW a haya un melding di cu awa di riolering lo a sali ariba caya. DOW hunto cu e team di contratista ta haci e leidingnan limpi, y ta kita e blokeo. Un biaha mas, ta constata cu a tira vet di cushina den e sistema di riolering cu ta blokia esaki.
Sr. Marlon Croes, di DOW ta haci apelacion na e comunidad y e restaurantnan pa no tira vet den e riolering. Esaki ta trece problema pa bo mes. Ora cu e molester bira pa e doño di restaurant, nan ta keha cu DOW ta haci trabaonan malo.
Tin trabaonan di control pa haci, y Sr. Marlon Croes a splica cu restaurantnan por uza un asina yama ‘grease trap’ pa ta sigur cu e vet no ta yega den e sistema di riolering, pero tambe mester conscientisa e organisacion cu e vet mester wordo separa y no ta bay den e riolering.
Ya caba a tuma contacto cu Directie Wetgeving en Juridische Zaken, unda cu tin un articulo cu mester wordo agrega na e vergunningsverordering. Aki ta unda cu si un restaurant pidi un vergunning, esaki ta mara na cu tin un ‘grease trap’ poni den e sistema. Esaki tin cu wordo hinca den e Landsbesluit Vergunningverordering, pa e por wordo aplica.
Den caso di DOW, si un peticion pa un construccion (bouwvergunning) wordo entrega cerca nan, nan ta percura cu e ‘grease trap’ ta mara na e bouwvergunning. Esaki ta pa loke ta trata peticionnan nobo. Pa loke ta restaurantnan existente, ya caba DOW tin un inventarisacion haci aña pasa, di ken nan mester acerca pa nan pone un ‘grease trap’. Te asina leu, Sr. Marlon Croes, director di DOW.