Koningin Wilhelmina Fonds (KWF), e fundacion pa preveni y combati cancer na Aruba, ta beneficia 100% di benta di e buki skirbi pa nos co-ciudadano Clyde Harms y publica cu co-financiamento di UNOCA. E buki ta un compilacion di storianan di e experiencia di e autor durante su añanan (1966 – 1973) trahando pa Esso na Tripoli, Libya.
Mirando cu na luna di Juni Aruba ta celebra Dia di Tata, KWF a dicidi di ofrece cuminsando prome di Juni, e buki Un Arubiano na Libia cu un descuento di 50%, rebahando e prijs di 50 florin pa apenas 25 florin. Un miho regalo no tin!
Un Arubiano Na Libia ta lesa facil y agradabel; e ta entretene y educa. E autor ta skirbi di su experiencia y observacionnan personal di un variedad grandi di topico den un region cu un cultura completamente diferente di esun di Aruba, den un pais cu ta hopi den noticia.
Clyde Harms tabata presente tempo cu Ghaddafi a tumba Gobierno di Rey Idris y e ta conta su historia personal. E tabata presente durante e “Guera di 6 dia” entre Israel y su bisiñanan Arabe cu a causa cu e famia di dje a wordo evacua cu avion militar Mericano di Wheelus Air Base pa Italia. E ta conta di su experiencia di cerca con e Italianonan a wordo expulsa di e tera caminda nan a nace. E ta conta con e y su famia tabata traha cerbes y biña casero clandestinamente despues cu Ghaddafi a prohibi tur importacion di bebida alcoholico.
Despues di lesa e 22 capitulonan di Un Arubiano Na Libia abo lo keda sorprendi cuanto bo a siña for di e buki. Berdaderamente, e ta un bon regalo, no solamente pa Tatanan, pero pa tur hende cu ta interesa den siña algo nobo. Probecha di e prijs reduci di solamente 25 florin y alabes yuda Koningin Wilhelmina Fonds preveni y combati cancer na Aruba. Un Arubiano Na Libia ta na benta na Plaza Bookshop (Dakota) y De Wit & Van Dorp Bookstores (Dakota y San Nicolas) y na e siguiente lugarnan: Oficina di KWF na Spinozastraat, Do It Center na Savaneta y na San Nicolas, WEMA na Ponton, Santa Cruz y San Nicolas y Bright Bakery na Piedra Plat.