Un aña di tragedia di e caso lamentabel di Tino Ruiz, su coleganan ta record’e
Entre tanto, un aña a pasa desde cu nos colega Tino Ruiz a perde su bida tragicamente. Esaki ta causa un tristesa enorme y incredulidad bou di e comunidad policial.
Un periodo unda cu hopi cos a pasa y hopi a wordo bisa durante e ceremonianan.
Ceremonianan cu hopi palabra bunita di colega y amigonan.
Palabranan bunita di coleganan lider unda cu nos tur sa cu esaki nan lo keda na palabranan bunita so.
Y e biaha aki tambe…. palabra so.
“Un aña despues di Tino… no tin cambio..”
Un polis, sea homber of muhe, ta traha un average di 16 ora pa dia, sea ta dia di fiesta of no. E polis mester t’ey.
Resolve casonan compleho, durante un dagdienst, subi caya den solo, cu manga largo.
Tempo a para keto y polis no kier renobacion. Un uniform di 30 aña, bunita pero cu ya tabata tin su miho temponan.
Ainda polis (homber y muhe) ta subi caya cu cabes na laira pa despues di cu warda caba, e mester tende cu e mester sigui traha te anochi laat. Nos ta traha te laat, nos no protesta contra di e falta di personal ya cu nos sa con importante e ta pa Aruba.
Pero, asina cu’n luchado, un polis kier tuma un dia liber pa descansa pa asina e pasa tempo cu su famia e ta haya como contesta:
“.. bo no mester a bira polis”.
E desigualdad dificil y e desekilibrio ora cu e polis, sea homber of muhe, ta dispuesto pa yena e bashi.
Pero esaki ta e sacrificio cu mester haci pa no wak bo famia a cambio di pago di 150%.
Bo mesun colega cu ta cambia di warda pa asina gana overtime pa gana punto cerca cu superior.
Nos ta core durante nos un shift di 16 di hora den un auto cu tin mas luz cu un kerstboom durante dianan di pasco. Cada biaha cu brake, nos mester reza cu durante un persecusion e brake por wanta.
Diariamente esakinan ta wordo scirbi bunita asina ariba un formulario. Pero, nada no ta wordo haci.. Un vehiculo cu ta safe, no ta un prioridad.
Prioridad tin. Pero e casonan menos importante ta wordo trata y pusha dilanti.
E meta di 15 boet di tur luna, ta wordo enfatisa cu menasanan.
Un forma obsoleto di gestion policial unda cu Hulanda a siña nos cu esaki ta bay a cuesta di nos comunidad.
E prioridad di e polis (homber y muhe) riba caya ta wordo dicidi door di e managernan.
Es decir, cu no mester bay p.e. den e barionan cu ta victima di ladronicia ya cu e 15 boetnan mester wordo cobra.
Solidaridad.. sea consciente di e union y e boluntad di asumi e consecuencianan.
Ta un lastima cu nos como comunidad policial ta asina leu for di otro.
Seis aña pasa nos a skucha un comisario di polis bisa mesun cos: cu nos tur di Cuerpo Policial ta traha ariba un isla apart.
Defende y para tras di otro ora cu situacionnan oneerlijk presenta.
E colega jong cu durante su stage tin un beneficio laboral completamente contrario cu su studiante/aspirant na un otro warda di polis.
Principio di igualdad
Al contrario, “nos” (nan) kier haci’e mas dificil pa nos colega, strobando e di crece.
Temponan frustrante di polisnan, caminda cu coleganan jong si kier cambio pero ta wordo wanta abao door di esunnan mas bieu, ya cu nan ta haya cu esaki ta demasiado agresivo.
Esaki ta logico ya cu e coleganan mas experiencia tin bo posicion caba y no kier mas cambio.
Pero nan a lubida cu un tempo, nan tambe tabata den e mesun posicion.
SOLIDARIDAD
Tino… hopi biaha nos a papia cu otro riba e asuntonan aki. Mi sa cu si nos tabata tin e combersacionnan aki aworaki, nos lo a yega na e mesun conclusion:
“great pa tin un lider cu conoce caya.. pero lastima cu e ta un soño inalcansabel”. Tino bo por imagina cu desde cu bo a bandona nos, nos no a wordo getest mas ariba nos conocemento di violencia.. nos instruccion oficial..”.
NEt despue di e tragedia, leiding a bay tapa nan ineficiencia.
Entrevistanan na radio, unda cu nan ta claim cu si tabata tin cursonan pa uzo di violencia.
Tino.. nos ta wak bo yora. Pero esaki no tin palabra…
Ta laga cuida nos costa sin duna material pero ta spera milager.
Tristo.
Mañan tambe lo nos bay cu nos cabes na halto traha pa nos pais Aruba y saca lo mehor di esaki..
Nos ta sinti bo falta