Departamento pa Asunto Social, (DAS), ta pidi tur famia riba bijstand pa tene na cuenta cu e ultimo dia pa aplica pa apoyo financiero pa aña escolar 2016/2017 ta acercando rapidamente, cu lo no tin extension, y cu ta otorga e ayudo financiero un biaha so.
Esnan cu por bin na remarca pa e sosten extra aki ta mayornan y yiu(nan) of yiu(nan) di criansa cu ta bayendo scol te cu e edad di 24 aña y cu tin derecho ariba bijstand te cu e pago di luna di Augustus 2016.
E areglo ta pa alumnonan di Scol Preparatorio (“Kleuterschool”) y pa alumnonan cu ta bishita scol regular durante dia (volledig dagonderwijs).
Condicion ta cu e yiu(nan) mester ta bibando na Aruba y cerca e mayornan den cas y nan mester ta inscribi pa e aña escolar 2016-2017.
Pa cada yiu cu ta bay scol lo ricibi Awg. 120,- extra (te na un maximo di Awg. 500,- pa famia) pa yuda pa cubri gastonan extra cu tin (schoolgelduitkering). Ta paga e placa aki hunto cu e pago regular di bijstand na luna di september 2016.
Tambe lo yuda paga un parti di e contribucion cu e mayor mester paga na e scol di su yiu (“ouderlijke bijdrage”) te cu un maximo di Awg. 120,- pa persona. E suma menciona ta bay directamente na e scol. Si e contribucion ta mas hopi cu e suma di Awg. 120,- e ora ey e mayor lo mester paga e diferencia.
Por busca e formulario di aplicacion na e scol unda e mucha(nan) ta inscribi cual tabata obtenibel desde 18 di Augustus 2016. Riba e formulario, cu Departamento pa Asunto Social a diseña specialmente pa e ocasion aki, tin un parti cu e mayor mester yena completo y firma.
DAS kier enfastisa cu e ultimo dia pa entrega e formulario ta diamars 30 di Augustus 2016, sin excepcion.
Dicho formulario por wordo entrega na oficina di Departamento pa Asunto Social na Oranjestad (Caya Mario E.Harms 11), durante oranan di trabou, di 8:00 am te cu 11.45 am y di 1:00 pm te cu 4.15 pm.
Pa mas informacion, yama libremente na 528-1100 y pidi pa Seccion di Bijstand.