Awe nos ta drenta den e ultimo siman pa loke ta bira e di tres Aruba Art Fair cu sigur ta bira un biaha mas e antesala di un cambio mas pa e cayanan di San Nicolas.
E artista Hulandes, Eelco van den Bergh, famoso pa su trabaonan gigantesco na New York, cu a otrog’e e premio Net New York Top 10 Street Artist, a finaliza e prome muraya di 30 meter di largura y 6 meter di halto cu ta e Rialto Building na San Nicolas.
Un beyeza di mural super dinamico cu colornan yamativo, depictando e beyeza di e mundo bao di awa cu su piscanan y e mundo riba awa cu ta e parhanan. Un pintura liber y yamativo cu ta forma e sala di Art Fashion cu ta tuma lugar dia 4 di October, 2018 cuminsando pa 6.30 pm.
E prome 100 persona, ta haya Goodie Bags di sopresa y lo ta e prome nan cu por tin mas libertad pa haya chens pa saca potret. E setup ta liber na entrada cu un antesala cu ta forma un walking inn Bar y cuminda cu standup tables pa intercambia y chill prome cu e evento.
E setup lo ta gigantesco y un danki grandi na e elenco di ELITE cu ta un di nos partnernan strategico. Ideanan innovativo y nunca prome bisto lo ser presenta na unda cada desiňador ta haya e oportunidad di conta nan storia y trese dilanti nan mensahe di un manera original.
E show lo keda inicia pa ALDO y su sapatonan y kedsnan pinta artisticamente pa e momento den intercambio cu e artista Lislaine Bermudez cu ta marca pauta cu un diseno original di tur loke ta nos Aruba.
E gran artista Hendrik Schouten, lo laga tur babuca cu su obranan. Loretti Design lo ta magnifico. Artista Osyth Henriquez, no ta solamente exepcional den su scarves, mas lo ta e sorpresa di e anochi pa un arte completamente diferente. Gran Artista di Venezuela Magon lo ilustra lo actual na Venezuela, e sufrimento y e grito pa cambio.
Durante e break tur por pasa den e antesala pa saboria un sushi of un pasaboca.
E gigante Kate Spade lo habri e di dos presentecion cu un ODE na e magnifico desiňadora. Un obra riba su mes.
Artista Internacional Gigliola Gomez a confecciona un liña original pa Art Fashion y lo trese esaki dilanti den un estilo Caribense. Zhuzhed by Ali, hoben y dinamico ta sigui pa e gran artista Elisa Lejuez cu joyas di Mersea Jewelry. Mientras cu Francis Sling di Curacao ta estrena su linea nobo di joyas.
E anochi ta wordo cera cu un broche di ORO na unda nos orguyo Ronchi de Cuba ta inicia su celebracion. E celebracion di 30 aňa di existencia. Un fiesta pa asina termina e prome bez cu mentenan creativo ta bin hunto y crea ARTFASHION.
Desde diahuebs e Artistanan di Aruba a cuminsa pa trese nan obranan. Ya caba mas di 200 obra a ser entrega cu lo forma e walkway pa e amante di Arte por bin presencia, mientras cu mas di un grupo di baile a inscribe y masha gruponan di musica lo ta trese nan cancionan. Desde Caha di Orgel te cu bandanan di JAZZ y un circo lo ta pa deleite di un y tur.
Plannan strategico, incluyendo artistanan di taya Internacional, entre nan e mihornan di mundo ta wordo busca pa sigui aumenta e arte riba e muralnan den e cayanan di San Nicolas.
E artista di Curacao Giovanni Abath lo traha un obra grandi durante di Aruba Art Fair y tur presente por presencia e artista aki den pleno accion. Un obra cu lo keda pa Aruba como simbolo di union entre Aruba y Curacao den e mundo di Arte y Cultura uniendo pa future den obranan, ideanan y fundacionan.
For di Barcelona, e artista Arubiano Elisabeth Ollė Curiel a inscribi pa participa y lo ta desfilando su obranan grandi. Elisabeth tin no solamente tin un galleria na Barcelona pero tambe un tayer na unda e ta pinta obranan pa artistanan grandi manera Antonio Banderas.
Despues di ArtFashion, Theaterstraat lo converti su mes den ArtisA runway cu ta e aglomeracion di Artesanonan treciendo y exponiendo nan obranan di Arte di Artesania, sea esaki ta tasnan, joyas, obranan den palo, mini tarhetanan y mucho mas, durante Aruba Art Fair 2018.
Aruba Art Fair 2018 ta posibel Danki na e partnership cu entre otro, Aruba Tourism Authority Sui Generis, Prins Bernard Fonds Caribe, Unoca, Departamento di Cultura, Divi Resorts Aruba, Kooyman BV, AIS, Tele Aruba, ELITE, Aruba Trading Company, Hyatt Regency Resorts y VNO.
Aruba Art Fair 2018 lo tuma lugar den e cayanan di San Nicolas, October 5,6,7, 2018. No perde!
FIN