Dialuna 12 di December proximo lo tin e ultimo Rosario Bibo pa aña 2016. Esaki lo tuma luga na kapel di Alto Vista cuminsando pa 7 or y mey di anochi.
Comision organisado ta invita un y tur pa bin presenta nan intencionnan. Tambe pa gradici pa e aña cu ta cabando. Nos ta gradici pa tur bondad ricibi y nos ta conforma cu tur loke por a sosode cu no semper tabata na nos agrado. Un malesa inespera, un accidente, morto di un ser keri ta haci nos mira mas y mas e misericordia cu Dios tin cu nos. Si nos a faya nos prohimo of falta respet p’e, anto ta ora pa reflexiona y pidi pordon, con duro cu esaki lo por ta.
Pa esnan cu a faya nos of cu a trata nos inhusto, tambe nos ta pidi pordon.
Comision organisado ta gradici tur esnan cu durante aña a asisti cada luna na e Rosario Bibo y tur boluntario cu a yuda den organisacion.
Comision ta desea tur hende, henter e comunidad Arubano, feliz dianan di fiesta. Cu e strea di Belen cu a briya mas cu dos mil aña pasa ariba pesebre di niño Hesus, sigui briya y trece paz den cada cas di famia na Aruba.