En conexion cu celebracion di temporada di fin di aña, e ta un tradicion cu Serlimar Sui Generis conhuntamente cu e aporte di Aruba Tourism Authority, A.T.A., ta organisa e ultimo Milieustraat di aña. Manera tradicion di tur fin di aña, Milieustraat 2018 lo cuminsa den luna di November y lo termina den luna di December y lo tuma luga den e cuater bario grandi nan di Aruba. E fechanan cu Milieustraat 2018 lo tuma luga ta;
18 – November – 2018: Colegio Felipe B. Tromp, Noord
25 – November – 2018: Don Elias mansur Ball Park, Dakota Oranjestad
2 – December – 2018: ex. Lucky Store, San Nicolas
9 – December – 2018: Centro Deportivo Rooi Afo, Paradera
Container nan di Serlimar SG lo ta disponibel ariba e fechanan menciona entre 7’or di mainta te cu 2’or di merdia. Tur habitante di bario y bisindario por haci uzo di e oportunidad aki pa benta articulo di cas, sushi di cura of otro tipo di desperdicio afo den e container nan disponibel. Durante e orario indica Serlimar S G lo transporta tur desperdicio den e container nan pa Parkietenbos. Pa es motibo Serlimar S G kier informa comunidad di Aruba pa marca e fechanan aki pa asina no perde e oportunidad pa deshaci di sushi na cas y asina cumpli cu e tradicion di limpieza di fin di aña.
Pa e aña 2018 Serlimar S G ta sera e proyecto Milieustraat 2018 cu exito, recordando ariba limpieza nan grandi cu a tuma luga den bario di Village na San Nicolas, Rancho na Oranjestad, Santa Cruz y tambe otro bario nan caminda a cumpli cu e responsabilidad pa mantene Aruba limpi y bunita. Serlimar S G lo continua cu e proyecto di Milieustraat 2019 pa asina sigui yuda comunidad di Aruba cu accion di limpieza den bario pa asina cumpli cu e responsabilidad y yega na e meta pa un Aruba limpi como herencia.
En conexion cu Miliesutraat 2018, Serlimar S G kier haci un peticicion na e comunidad di Aruba, cu ta haci e limpieza di fin di aña, pa no tira paña, sapato of co’i hunga afo, cu no ta uza mas pero pone esaki un banda y tuma contacto cu Serlimar via Facebook Messenger of na telefon 5245080 pa asina conhuntamente cu Fundacion Pa Nos Comunidad, nos por yuda esnan den necesidad pa e temporada di fin di aña.
Serlimar S G ta sumamente contento cu e colaboracion di parti di A.T.A. cu ta haci cu e accion di limpieza grandi pa fin di aña posibel. A.T.A. hunto cu e proyecto di Ban Serio ta enfatisa cu nos tur ta aporta y sigur mester reconoce nos impacto nos por tin ariba Aruba. Milieustraat lo bay continua den aña 2019 cu hopi mas accion di limpieza den bario nan rond di Aruba. Pa haci peticion pa bo bario tambe bin na remarca pa un limpieza completo, por manda peticion via email na Serlimar S G [email protected], por manda nos un mensahe via Facebook Messenger of por tuma contacto cu nos Marketing & Sales Department na telefon +297 5245080. Por raporta tambe ariba www.infraruba.com pa haci peticion pa limpieza den bario.