Diasabra 27 di oktober San Nicolas ta invita pueblo bin experiencia e delaster edicion di e evento mensual Experience San Nicolas den centro di ciudad. Lo tin mercado, tours, musica riba caya y tayernan creativo. Tambe e museonan, tiendanan, y restaurantnan den San Nicolas ta habri.
Na e mercado di San Nicolas, Sani Market, bo por bin gosa di un variedad di producto y cuminda cu lo ta na benta den promenade di San Nicolas. No solamente por bin cumpra pero por gosa tambe di un ambiente caribeño cu e mercado ta ofrece y di un ambiente ameno cu e vendors ta ofrece. Sani Market ta tuma lugar di 09.00 am – 01.00 pm.
Un actividad jena cu creatividad y cultura di nos hendenan ta e Art Walk Tour. Por registra pa e tour aki y durante e tour lo siña hopi na Museum of Industry, na e murales den ciudad di San Nicolas y na Cosecha su tienda di artesania y arte local. E tour ta wordo duna door di un guia profesional. Registracion ta necesario y esaki por wordo haci na 5847090. Prijs special pa e tour ta $15 dollars pa persona y ta inclui un boter di awa. E Art Walk Tour ta di 10.30 am – 12.00 pm y punto di encuentro ta Museum of Industry.
Tambe bo por registra pa e Museum Bus Tour pa bishita nos museonan bou guia di e curator di Fundacion Museo Arubano. Ta cuminsa e tour na Museo Historico na Oranjestad y despues lo bin pariba pa siña mas di nos herencia na Museum of Industry y Community Museum. E prijs special pa local ta solamente AFL 15,- pa persona y lo tuma lugar di 09.00 am – 01.00 pm. Registracion ta necesario y esaki por wordo hasi na 5885199.
Na Cosecha tin un tayer creativo unda por traha un Shoco, nos parha nacional, riba driftwood. E artesana Maja Lepsanovic lo siña bo un diseño di Shoco cu lo wordo traha cu klei y pintura riba un pida driftwood. Prijs ta Afl 50,- y esaki ta inclui material y un bebida. Edad pa por participa ta di 10 aña bai ariba. Den tienda di Cosecha por haya mas informacion di tur e piesanan cu Seyo Nacional cu nos localnan ta traha. Registracion pa e tayer ta necesario y esaki por wordo haci na [email protected]. E tayer ta di 10.00 am – 12.00 pm.
Wema San Nicolas ta ofrece un tayer cu e material di tires. Resto di tires cu a wordo uza den workshop anterior, lo wordo uza pa traha un bunita diseño di dream catcher. No por tuma mas registracion pa e tayer aki pasobra no tin cupo mas.
Durante di Experience San Nicolas, e artistanan clave di San Nicolas, Mo y Michael lo zorg pa entertainment musical den promenade di San Nicolas.
No perde e oportunidad aki pa experiencia San Nicolas, e lugar na unda bo mester ta diasabra awor. Bishita nos Facebook Experience San Nicolas pa mas informacion y detayes di cada actividad.