Bo ta gusta moda of bo tin un ambicion di bira diseñador di moda? Wel ata bo oportunidad! Inscribi bo mes awor na Ateliers ’89 pa e workshop aki titula “Heroenan den Moda”.
Durante e tayer bo lo ta diseñando e trahe di bo heroe personal, cual pa cada persona lo nifica algo diferente mirando cu cada persona tin su individualidad y cada heroe tin su identidad. Pa diseña e trahe di bo heroe bo lo siña con pa traduci identidad den moda por medio di uza colo, ahuste di paña y escogencia di material. Despues di enfoca riba dibuhamento di patron y siña con pa adecuadamente representa proporcionnan di curpa humano, e trabou cu e tela y mashin di cose ta cuminsa. Finalmente bo lo siña con pa termina e imagen fabuloso por medio di uza accesorionan y make-up.
Apart di uza e mashin di cose nos ta busca otro maneranan di arma e prenda. Den e cuater simannan nos lo traha conhuntamente riba un coleccion grandi, culminando den un show profesional. Si bo tin un mashin di cose of bo por fia un, trece na e tayer. Tur hende ta bon bini na e workshop cu of sin experiencia di diseño. Cada persona lo haya asistencia y evaluacion di acuerdo cu nan propio nivel. Sinembargo, un compromiso y involvimento completo ta wordo spera di bo.
Diseñador Agata Mickiewicz ta naci na Polonia, cu experiencia di trabou y estudio na diferente pais rond mundo. El a studia moda na Wroclaw (Polonia), na Academy of Fine Arts Antwerp (Belgica) y na Gerrit Rietveld Academy na Amsterdam (Hulanda). El a traha pa entre otro, studionan di diseño di Iris van Herpen, Victor and Rolf, Rick Owens y Gosia Baczynska. Na Polonia el a traha como diseãdor di trahe pa varios serienan di television y el a duna les na e Fundacion Atelier na Warsaw. Recientemente el a biba na Reijkjavik (Islandia) y pronto lo ta basa na Berlin (Alemania).
Workshop Design
Workshop Traha Instrumento Musical cu Krisztina Czika na Ateliers ’89. 12 November – 7 December 2018.
Bo ta cordialmente invita pa participa den e tayer fantastico aki pa traha instrumento musical. Duna pa diseñador Krisztina Czika. E artista visual y diseñador di Hungria ta trahando riba proyectonan cu papel recicla. Den su trabou el a descubri cu e material aki tin hopi bon acustica cual ta bon pa traha cahanan di zonido.
Krisztina ta biniendo Aruba y kier comparti y investiga e informacion aki cu bo. Su plan ta pa construi un mashin cu por recicla papel y traha instrumentonan musical cu e material aki.
Hopi corant cu na Aruba ta imprimi diariamente ta genera hopi sushi cual ta un problema riba nos isla. Bo tambe ta preocupa pa nos medio ambiente y interesa den e rezo creativo di material? E ora ey e workshop aki ta pa bo! Bo ta bon bini te hasta sin experiencia cu muziek. Cu tur e instrumentonan nos lo por duna un concierto expresivo pa conclui e tayer.
Pa participa preferibel manda un e-mail na [email protected] o yama su director na telefonan 5885776 o 5654613. E workshopnan aki ta pa un luna y ta Dialuna pa Diahuebs di 6.30 pa 9.30 na Ateleirs ’89. Cu ta situa na Dominicanessenstr. 34 net schuin tegenover di Maria College na playa. Edad ta 12 aña pariba. Inscribi na tempo ya cu cuponan ta limita