E dia ta yega pa e tan spera careda cu ta core for di Joe Laveist Sport Park, San Nicolas te na Alhambra Casino, Eagle cu ta tuma luga riba diadomingo dia 26 di Maart 2017 pa 5:30a.m
Esaki ta un tradicional 21K cu ta hala atencion di nos atletanan local pero tambe di esnan internacional.
Atletanan for di entre otro Suecia, Merca, Colombia, Canada y Venezuela ta prepara grandemente pa e competencia aki, hunto cu nos propio atletanan local cu ta entrena fuerte y sigur pa mehora nan tempo.
Inscripcion ta tumando luga e siman aki ainda te cu diabierna 24 di Maart 2017 (tan ten cu tin lugar) pa e siguiente categoria:
Student Relay
Pa un team registra pa e categoria di Student Relay, e team mester tin aprobacion di nan scol.
Costo di inscripcion pa e categoria aki ta Afl. 20 pa persona cu ta encera un t-shirt, bib number y medaya conmemorativo. Participantenan di e team mester atende e mesun scol y e team mester consisti di 4 participante, di cual por lo menos 1 mester ta mucha muhe. IBiSA ta invita hobennan interesa pa forma nan team y inscribi trempan, mirando cu inscripcion ta limita na solamente 20 team.
Corporate Relay
Cada team mester consistidi 4 participante di cual minimo 1 mester ta femenino y tur 4 mester ta labora na e mesun compania/organizacion. Costo di inscripcion pa e categoria aki ta Afl. 25 pa persona cu ta encera t-shirt, bib number y medaya conmemorativo. IBiSA invita tur compania/organisacion pa forma nan team di inscribi trempan. Inscripcion ta limita na solamente 30 team.
Inscripcion di Corporate Relay y Student Relay por wordo haci solamente na IBiSA situa na Frankrijkstraat 1 of na Sport Centrum San Nicolas situa na Dr. Schaepmanstraat 52 for di 7:30 a.m. pa 12’or di merdia y for di 1:00 p.m. pa 4:00 p.m.
Inscripcion individual pa 21K
E edad minimo pa participa individualmente ta 16 aña riba e dia di careda. Costo di inscripcion vanaf 20 Maart general ta Afl. 35 of US$ 20 cu ta encera t-shirt, bib number y medaya conmemorativo na final. E premiacion na final ta pa coredonan femenino y masculino den e siguiente categorianan di edad 16-19, 20-29, 30-34, 35-39, 40-44, 45-49, 50-54, 55-59 y 60+ prome, segundo y tercer luga respectivamente.
Inscripcion individual por wordo haci online tambe via www.arubarun.com
Lo tin e posibilidad di paga online of print e confirmacion y pasa paga te cu diahuebs dia 16 di Maart pa e “Early Bird “ Prijs y di dia 20 di Maart te cu diabierna dia 24 di Maart pa prijs di AFL 35.00 pa participante local y $35.00 pa participante internacional na oficina principal di IBiSA situa na Frankrijkstraat 1 y tambe na Sport Centrum San Nicolas situa na Dr. Schaepmanstraat 52 for di 7:30 a.m. pa 12’or di merdia y for di 1:00 p.m. pa 4:00 p.m.
Ta corda tur participante pa inscribi tempran y sigura bo participacion na e gran evento aki, pues riba e diadomingo mainta di careda no ta tuma inscripcion sino solamente ‘check-in’ di e atletanan cu ta presente pa participa.
Pa esnan cu a registra caba IBiSA ta recorda tur participante pa busca nan “Race Package” (Dry Fit Tshirt y bib nummer) diasabra dia 25 di Maart entre 9:00a.m. y 4:00p.m. na Alhambra Casino Shopping area.
Pa mas informacion por bay riba Facebook di IBiSA: IBiSA Aruba of por yama tambe na telefon 582 4987.