Departamento di Enseñansa Aruba, seccion Examenbureau ta recorda cu aplicacion pa Landsexamen 2017 ta tuma luga den e periodo di 1 September pa 30 September 2016.
E formulario pa aplica ta obtenibel via e website di Departamento di Enseñansa Aruba | www.ea.aw (bou letter L di Landsexamen) desde 1 September 2016. Download e formulario pa aplica y yen’e. Entrega e formulario yena completo y corecto hunto cu un uittreksel di Bevolkingsregister di Aruba na bali di Examenbureau, Belgiëstraat #2.
Candidatonan cu ta cumpli cu tur reglanan di inscripcion y a pasa e “screening” ta wordo notifica pa pasa entrega tur documentonan necesario y recibo di pago pa completa e inscripcion.
Tur aplicacion cu drenta despues di 30 September 2016 y esnan cu no ta yena completo no ta bin na remarca pa wordo procesa.
Na landsexamen vwo/havo/mavo 2017 por participa esnan:
cu a entrega nan formulario di aplicacion na tempo (prome cu dia 1 October 2016), yena completo y na e instancia concerni;
cu a paga na tempo e suma concerni pa por pasa examen;
cu entrante 1 April 2017 tin e edad di:
• 17 aña of mas pa por participa na e landsexamen mavo;
• 18 aña of mas pa por participa na e landsexamen havo;
• 19 aña of mas pa por participa na e landsexamen vwo
Excluyendo punto 1, por participa tambe na landsexamen esnan cu ta bay un mavo, havo of vwo scol y cu kier logra un “1-vakdiploma” riba e mesun nivel di scol cu nan ta siguiendo. E materia aki no mag forma parti di e pakete di materianan cu e candidato a scoge na scol.
Certificadonan obteni na Aruba ta valido pa un periodo maximo di 10 aña entrante 1 Augustus 2012. Esaki ta nifica cu certificadonan mas bieu cu 10 aña no por wordo uza mas pa obtene un diploma di vwo, havo of mavo.
Entrante e aña escolar aki 2016-2017 e materia wiskunde A, B y D di havo ta wordo examina segun un programa di examen nobo. Candidatonan cu durante e aña escolar aki aplica pa prome biaha pa e materia wiskunde A, B y D di havo lo haci examen segun e programa di examen nobo.
Candidatonan cu, den pasado, a haci examen di e materia wiskunde A, B y D di havo segun e programa di examen bieu ta haya durante e aña escolar aki (2016-2017) un ultimo oportunidad pa haci examen di wiskunde A, B y D di havo segun e programa di examen bieu.
Entrante e siguiente aña escolar 2017-2018 no tin examen di wiskunde A di havo segun programa di examen bieu mas, por haci solamente examen di wiskunde A, B y D di havo segun e programa di examen nobo.
Pa mas informacion por acudi na na nos website www.ea.aw/landsexamen y sigui Enseñansa Aruba | Education Aruba riba Facebook of Twitter pa keda na altura.