Temporada di fin di aña ta yegando y e matamento di bestia lo bira mas intenso. Sr. Sherman Libie. Keurmeester na Veterinaire Dienst ta elabora ariba esaki.
Actualmente Veterinaire Dienst a haya hende nobo pa asisti den e trabao di fin di aña. Tur aña ta establece un fecha limite cu por trece bestia pa wordo mata. For di comienso di december Abattoir lo cuminsa traha di dialuna pa diahuebs, for di 9 or di mainta. Gruponan grandi ta bay segun afspraak. Algun criado di bestia ya caba a traha na afspraak, tin biaha for di mei anochi, te cu mainta. Esaki ta pa e liña no pega, pa mainta e trabaonan no pega.
Prome cu e bestianan wordo mata, nan mester pasa nan keuring. Y si nan pasa e test ey, nan ta bay pa e siguiente fase, pa wordo mata. SI e bestia tin algun malesa, e ta wordo mata, pero e carni ta bay pa wordo destrui.
Na Aruba e criadero di bestia ta un poco dificil, pero a pesar di tur cos, nan ta luchando cu tur loke nan tin, pa nan por sigui cu esaki. Tin un suma cu mester wordo paga, cual ta e keurloon, y tambe gobierno ta cobra 25 ct, pa cada kilo.
Aki na Aruba tur bestia mester wordo mata na Abattoir, p.e. carne, cabrito etc. Antes tabata mata avestruz tambe na Abattoir, pero esey no ta sosode mas. Y cabay, ta ora cu tin un problema y cu mester pone drumi, ta haci esaki na Abattoir, pero esey no ta pasa mucho.
Por ultimo, Sr. Libie a enfatisa cu dia 18 di december ta ultimo dia pa mata bestia na Abattoir. Criadonan di bestia por traha un afspraak, cual ta pidi pa haci esaki trempan. Pero tur otro por bin Abattoir no mas tarda cu 9 or di mainta.