Manera conoci, 6 container di klapchi a caba di yega Aruba, hopi menos compara cu loke ta custumbra di busca tur aña. Sr. Rubin Ponson, experto den explosivo na DOW, ta splica cu control lo sigui normal mescos semper hunto cu tur departamento concerni, y logicamente cu menos punto di benta, e control lo ta mas stricto riba cada punto di benta.
Semper tin un debate tocante e asunto di container tur caminda rond Aruba, banda di negoshi of cas, a puntra sr. Ponson si kisas ta momento pa cambia ley pa por ehempel haci e solamente tres punto di benta di klapchi na Aruba, unda eynan so bo ta bay pa busca bo klapchi. “Esey ta un sugerencia cu nos a yega di manda hopi tempo pasa caba pa gobierno, e manera cu nos ta pensa lo por wordo haci miho,” segun sr. Ponson.
Esaki no a wordo concretisa ainda pero esey ta berdad factornan cu a wordo proponi, pa pone cierto puntonan di benta, por ehempel riba un veld grandi caminda tur container lo por para y bende. Tambe tabata tin algun otro proposicion pero te awe ta keda cu e manera tradicional, y mester djis keda purba tene na cuenta y cuida e parti di siguridad semper. Dia di benta ta 27 di December, y ultimo dia ta bira 31 di December, anto e ultimo dia pa tira klapchi lo ta riba 1 di Januari.