ORANJESTAD – Departamento di Impuesto ta informa cu su campaña pa yuda cu yenamento di e declaracion (aangiftebiljet) di inkomstenbelasting 2015 ta yegando su final.
Den e dianan venidero Departamento di Impuesto lo ta na MFA Noord y YMCA San Nicolas. Tur cliente cu ta cumpli cu e condicionnan pa ricibi ayudo ta bon bini y no tin mester di haci un cita.
Kendenan por participa?
1. Tur persona soltero cu tin un entrada bruto di no mas cu Afl. 75.000,-;
2. Tur persona casa cu – hunto – tin entrada bruto di no mas cu Afl. 150.000,-.
No por brinda ayudo na esunnan cu tin un empresa propio of cu ta traha riba nan mes.
Fecha y orarionan di servicio lo ta dia 22 te cu 24 di Mei 2017 y 29 te cu 31 di mei 2017 na MFA Noord y YMCA San Nicolas for di 8 or di mainta te cu 12 or di merdia, y di 1.15 di merdia pa 4 or di atardi.
Trece documento
Departamento di Impuesto ta pidi su clientenan pa trece e formulario di declaracion hunto cu tur comprobante necesario relaciona cu entrada y gasto, tanto na Aruba como den exterior.
Alabes Departamento di Impuesto ta informa cu e asistencia brinda cada luna durante e ultimo 6 lunanan no lo continua despues di dia 31 di mei. Esaki pues ta e ultimo oportunidad cu e clientenan tin pa por haya ayudo cu yenamento di e formulario di declaracion di inkomstenbelasting 2015.