Presidente di Sindicato UEA, Gilbert Ruiz, hunto cu algun miembro mas di directiva, a bay na oficina di Mediador di Gobierno pa un reunion. Ruiz a splica cu mediador a informa nan cu STA a manda pidi un referendum, pasobra segun nan, nan a haya 80 firma, caminda cu te awe no a haya e firmanan aki cu a tuma retiro for di UEA. Nan tabata tey na mediador y nan a keda informa cu STA a pidi un referendum.
UEA tambe ta participa na e referendum y nan no tin nada contra di esaki.
Ruiz a sigui splica cu e no sa kico por a pasa cu e 81 trahadonan aki. E no sa cu e dia eynan nan lo a lanta cu pia robes y a coy otro rumbo. E no sa kico nan ta papia cu nan no ta haya nada di e sindicato.
UEA ta bezig tratando dos caso actualmente. Loke ta e pensioenfonds, cu ta bienestar di tur trahado cu ta miembro y tambe un herinrichting, unda cu ta bezig cu un sociaal protocol y un vertrekregeling, pa esnan cu ta desea voluntariamente, un dia si e herinrichting drenta na vigor y ta pensa cu nan no ta bay keda mucho mas, nan por tin algo eynan cu nan por acudi cu nan por haya un pakete pa nan bay, pero esey ta voluntariamente. Mester acerca gerencia e ora y bisa cu e no ta desea di keda den e structura nobo aki y ta tuma un pakete. Esey ta loke tin. Pero locual Diego de Cuba ta papia cu tin algo cu nan a firma den CAO, un protocol. No tin nada di haber cu esey. No a firma nada pa condena ningun trahado. Te awe no a firma nada pa ningun hende. Al contrario, un protocol cu a firma sigur, ta pa defende e trahado. Esey ta bisa bon cla. E punto number 1 den e protocol ta bisa cu tanten cu e structura nobo cu gerencia, Elmar kier bin cun’e,si e no cuminsa di top, bin abao. Normal, den pasado tin e neiging cu tur cos ta cuminsa abao y despues ta bay ariba. E biaha aki, si no cuminsa di ariba bin abao, e no ta conta pa UEA tampoco. Entrante 1 di Januari 2018, gerencia no ta cla cu estructura nobo eynan, cu e ta pone un salarisstructuur pa tur hende di ariba te abao, no ta conta pa UEA tampoco. Esey ta e protocol cu UEA tin. Esey ta e protocol cu tanto famoso cu nan ta papia di dje, cu tin algo bao di mesa, cu ta hole, cu lo condena trahado, al contrario, ta salba e trahadonan. Akinan tampoco no ta haya un salarisstructuur si no tin pa otronan.
Por ta tin miembro no ta corda kico a papia den e reunion general pa loke ta e protocol, Ruiz a splica.Na Juni 2016, ora cu a convoca un reunion general pa aprobacion di e CAO cu a wordo acepta, den su mayoria total. Eynan caba a trece padilanti pa tur hende mira. Ademas tabata tin un comision cu a representa e trahadonan e tempo ey, pa splicanan kico ta encera e CAO. Nan a lesa e CAO. Ruiz no sa kico nan tabata tin den nan cabes of ta lubida asina lihe, pero nan tur a mira e CAO. Esnan cu tabata den e comision tambe a lese y tin di nan a saca potret. Awe nan mes ta tuma participe na un paar di hende pa sigui instiga otronan, cu tin algo malo firma. E ora ta ki clase di personanan nan ta, segun Ruiz.
Ruiz a sigui comenta cu sr. Diego de Cuba ta un sindicalista di hopi aña. Ruiz ta wak’e cu un trayectoria basta largo. Loke ta berguensa, pa sinta gaña hende cu asina cu gana e referendum, ta coy e CAO y kibr’e y ta negosha algo nobo.
E CAO eynan no ta di STA. E ta firma cu UEA. Pa por kibr’e, tin cu warda te cu 2020 yega. E dia eynan si gana e referendum, e por cuminsa negosha di su pakete, su CAO. Ruiz a bisa pa de Cuba stop di gaña coy loco. Nada por haci cu e CAO. Tanten cu UEA ta keda existi y si apesar cu keda cu dies miembro,e no por haci nada cu e CAO eynan.
Ruiz ta reta de Cuba pa e bin y haci esaki.
Cu de Cuba a splica cu tin algo firma bao di mesa, Ruiz a splica pa de Cuba trece prueba di esaki.