Klein Curaçao, un zona caminda cu e turtuganan carey y turtuganan berde, ambos den peliger critico, ta traha nan neishi, ta bao menasa. Asina Sea Turtle ConservationCuraçao (STCC) a informa.
Segun STCC, un tour operator nobo ta destruyendo ilegalmente e vegetacion door di remove e matanan di “banana di rif” (tambe conoci como verdolaga marina). E vegetacion aki ta esencial p’e neishi di e turtuganan marino y pa preveni erosion. E beach banda west di e isla, unda e tour operatornan ta ubica, tin mayoria di e neishinan di turtuga marino, segun un articulo publica den curacao.nu.
E eliminacion di e vegetacion aki ta menasa e duinen, cu ta crucial p’e isla. E duinen ta captura e particulanan di santo y ta yuda den su formacion, loke ta preveni erosion. Si e vegetacion aki disparce, e duinen lo dispare y e beach lo erosiona pa lama.
Esey ta nifica cu e beach ya no lo ta adecua pa recreacion. P’e turtuganan marino, esaki ta traduci den un zona di pone neishi mas chikito y e destruccion di e neishinan debi n’e marea halto. Eventualmente e beach lo bira inadecua pa traha neishi, loke por conduci n’e desaparicion di e turtuganan marino.
Sea Turtle Conservation Curaçao ta trahando durante varios aña pa proteha e area aki di e beach. E organisacion ta indigna y tristo pasobra e zona aki awo ta wordo destrui ilegalmente door di cudishi economico. Durante varios decada, e turtuganan marino na traha nan neishi aki y debi na cudishi y turismo, e area aki ta wordo destrui.
Accion
STCC ta haci un yamada na publico pa uno den e proteccion di e turtuganan marino di Klein Curaçao. Compartiendo informacion, dunando sosten n’e esfuersonan di conservacion y exigiendo medida inmediato, por sigura e futuro di e turtuganan marino na Klein Curaçao.
