ISTAMBUL, Turkia – Turkia a tuma e decision historico di apoya e sistema presidencial ehecutivo, e presidente Tayyip Erdogan a bisa, agregando cu e “si” a logra 25 miyon di voto den e referendum di diadomingo, un bentaha di 1.3 miyon riba e “no”. Erdogan, kende a papia for di su residencia oficial na Istambul, a bisa cu e referendum a cera porta di un historia largo di intervencionnan militar den e Gobierno di Turkia.
“Turkia pa prome biaha den su historia a dicidi cu boluntad di Parlamento y di su pueblo riba un cambio asina importante,” el a bisa.
“Pa prome biaha den historia di e Republica, nos a cambia nos sistema di Gobierno por medio di politica civil.”
E votonan pa e “si” a alcansa e 51.3 porciento tras e apertura di 98.2 porciento di e urnanan pa e escrutinio, e agencia di noticianan estatal, Anadolu, a bisa, aunke e bentaha estrecho por reduci den e ultimo etapanan debi na e resago ente e apertura y e computo di e votonan.
Fuente: Reuters