ANKARA, Turkia – E supuesto autor di e atentado cu a laga 39 morto y 65 herido Bispo di Aña den un club di Istambul a wordo aresta pa polis, segun e Gobierno a confirma awe, sin facilita mas detaye.
“E terorista a wordo captura ayera den un operacion policial, ta wordo interoga awo y tin hopi detaye cu nos ta mantene (den secreto) pasobra e operacion ta continua,” e minister Turco, Binali Yldirim a anuncia dilanti medionan, Efe a indica.
E supuesto autor di e atentado cu a laga 39 morto y 65 herido Bispo di aña den un club di Istambul tabata un ciudadano Uzbeco di 33 aña cu a ricibi entrenamento na Afganistan y a actua den nomber di e grupo Yihadista Estado Islamico (ISIS), autoridadnan Turco a informa, na momento di confirma e aresto.
“Esaki ta claro cu su accion a wordo haci den nomber di Estado Islamico,” e gobernador di Istambul, Vasip Sahin, a splica na momento cu a confirma cu e persona deteni ayera noci tabata Abdulkadir Masharipov, naci na Uzbekistan na 1983.
Su nomber den clave tabata Abu Muhammed Horasani.
Fuente: El Universal