Internacional: Un turista Mericano a wordo deteni despues cu supuestamente el a biaha pa un isla bandona den Bahia di Bengal y a purba tuma contacto cu un di e tribunan mas isola di mundo.
Mykhailo Viktorovych Polyakov, di 24 aña, a haci e biahe ilegal pa North Sentinel Island, cas di e misterioso tribo Sentinelese, dia 29 di maart, segun polis di India a bisa.
North Sentinel Island ta un tera mas o menos di e tamaño di Manhattan den e Islanan Andaman y Nicobar, mas o menos 1.200 km for di e continente di India. Ley di India ta prohibi bishita na e isla pa asina conserva e manera di biba di Sentinel y proteha nan di malesanan moderno, na cua nan no tin inmunidad.
Aunke Polyakov a logra yega e isla, e no ta parce di a drenta den contacto cu e tribu Sentinela, Jitendra Kumar Meena, hefe di Departamento di Investigacion Criminal di Polis di Andaman y Nicobar, a bisa. El a wordo mira pa un piscado local na caminda bek y a wordo aresta dos dia despues, segun Meena. Polis a tuma den beslag un boto di rubber y un motor di Polyakov. Te ainda e no a wordo acusa di ningun delito.
Encuentronan anterior cu e tribu a resulta fatal. Na 2018, supuestamente e misionero mericano John Allen Chau a wordo mata pa miembronan di e tribu despues di a yega North Sentinel Island, sperando di comberti e poblacion local na Cristianismo.
