Diahuebs merdia e boto di pelican monforte tabata cu grupo di turista den e boca di Mangel Halto y aki turistanan a ba snorkel. E personal di e pelican a tuma nota di algo straño na un di e turistanan y a bula bay den su direccion y a constata cu e persona no ta reaccionando.
Mesora a bati alarma na autoridad, unda a mobilisa polisnan y ambulance cu urgencia pa area di Balashi. Debi cu e catamaran no por yega area di pier di palm island, e fastboat di palm island a duna un man pa trece e persona na nan pier, mientras cu tabatin reanimacion andando.
Ambulance a presenta basta lihe na e pier di palm island y a sigui cu e reanimacion pasobra e turista no tabata reaccionando. Tabata invano despues di basta rato di reanimacion y asina a yama dokter Texier pa presenta na e sitio pa constata morto di e turista cu ta un persona di riba 60 aña di edad. Slachtofferhulp tambe a presenta pa duna un man na e famia den momentonan dificil.