Central a dirigi patruya na un Low Rise Hotel pa un persona indesea. Eynan a papia cu e securitynan na e sitio, kendenan a duna cuenta di loke a pasa. Tambe a mira un homber Mericano fuertemente bao di influencia di alcohol y/of un ke otro substancia. Security a declara cu e homber a bolter un pochi di mata y a menasa nan. E homber no a reacciona riba nan pregunta di unda e tabata keda y tabata fresco. A papia cu e homber kende a duna e nomber di JTMcG, kende a declara cu e ta keda na dicho hotel. El a keda bisa cu e tin un biyete di $100 cu el a perde y cu e tabata busk’e. McG a wordo calma y a wordo avisa bon cla cu e mester keda trankilo si e kier bay su camber, sino e lo wordo deteni. McG a mustra comprension pa esaki. Despues di a papia cu un empleado di e hotel, esaki a confirma cu McG ta keda eynan cu su tata y otro miembronan di famia. Polis a bay hunto cu e securitynan na dicho camber. Despues cu e madrastra di McG, kende a habri e porta, McG a drenta paden. Durante un conversacion cu e madrastra di McG, McG a habri e porta di camber bek y a insulta polis y a cera e porta masha duro mes. E madrastra a wordo splica claramente cu McG lo wordo deteni si e bira inkieto un biaha mas y haci desordo na e hotel. Despues e swa y ruman muhe di McG na e camber y a keda pa purba di calma McG.
Pa mas of menos 4’or y 25 di marduga, Central a manda patruya atrobe na dicho hotel pa di dos biaha pa un persona burachi. Eynan a papia cu security un biaha mas kendenan a declara cu e tata di McG, kende despues a duna e nomber JJG, a drenta den nan camber y a busca problema cu e yiu homber. E yiu homber a wordo hiba na un otro camber door di su amigonan. E tata no tabata contento cu e no por a haya su yiu homber y a bay den busca su yiu. E tata a bula for di e balcon di camber pa core bay. E security a declara cu e tata a cana bay direccion Divi. Un otro security y un homber kende a bisa cu e yama G, a bay tras di e tata y a want’e riba e parkinglot di Divi, te ora cu polis a yega. Na e sitio polis a mira cu e tata tabata fuertemente bao di influencia. Den cuadro di esaki, el a wordo deteni. Loke e tabata tin cun’e den su posesion, a wordo duna na G. Central a wordo poni na altura.