Diadomingo a sosode un incidente cu a hala su atencion, unda un turista a joyride un ambulance pa despues e mes wordo transporta den ambulance pa hospital.
Tabata diadomingo pa casi 9’or di anochi ta wordo informa cu un Ambulance, TR-29, a wordo horta y cu e lo coriendo rond den area di Wayaca.
Den e ambulance parti patras, lo tawata tin un Paramedico, unda cu dado momento a hay’e cu un ambulance cu a cuminsa move sin niun hende bis’e algo. Un otro colega cu lo a mira kico a sosode, a sali na careda tras di e ambulance, pero mucho e no por a haci.
Ariba e caminda den Wayaca unda antes tawata casnan di polis e hende homber a para e vehiculo y baha core bay direccion nort.
Polisnan cu a yega na e sitio, a cuminsa busca den bisindario y a bin topa cu e homber Mericano, kende tabata parce di tabata bou influencia di un substancia. E no tabata actua normal.
A pone den auto di Polis y transport’e pa Warda di Polis. Eynan e polisnan a pasa den un susto. Na momento cu e tabata bahando di e vehiculo di transporte, el a bira malo. El a haya manera un tipo di ataca y tabata bati na vloer, pa cual mesora a pidi presencia di ambulance.
Paramediconan mesora a drenta den accion y despues di algun minuut cu a stabilisa e homber Mericano, a hib’e emergencia pa atende cu ne.
