Turismo ta reforza e economia den e prome seis luna di 2018

Turismo ta reforza e economia den e prome seis luna di 2018

Awe Banco Central di Aruba (BCA) ta publica “State of the Economy” pa e prome dos trimesternan di 2018. E publicacion aki ta duna un sinopsis di e desaroyonan economico local y internacional di e periodo aki. E puntonan mas importante ta presenta abou, incluyendo un resumen di e indicadornan economico principal.
Compara cu 2017, actividadnan economico di Aruba ta parce di tabata marginalmente mihor den e prome seis luna di 2018. Indicadornan turistico disponibel ta mustra un desaroyo positivo consistente ya cu e cantidad di turista, bishitante di crusero, anochi hospeda, pero tambe ocupacion di hotel y entrada hotelero a demonstra cifranan fuerte di crecemento. Tambe, ingresonan turistico raporta pa banconan comercial a marcha bon den e prome seis luna di 2018
E bon desaroyo den turismo, sinembargo, a wordo mitiga pa resultadonan mixto di indicadornan di consumo y inversion. Di un banda, confiansa di consumidor a bira mas negativo, mientras confiansa di empresanan a cay. Di otro banda, entradanan di impuesto relata na consumo a crece, tabata tin varios proyectonan di inversion grandi andando, y e balor di hipotecanan a subi. Importacion a crece significantemente den casi tur categoria, relata mas tanto na demanda di turistanan y proyectonan di inversion grandi. Combina cu un caida den exportacion (no‐turismo), e subida di importacion ta significa un deterioro den e deficit comercial.
Inflacion a conoce un desaroyo di aumento den e prome mita di 2018 resultando den un tasa di inflacion anual di 3,4 porciento na juni. Prijs di gasolin a subi cu un averahe di 10,6 porciento den e prome dos trimesternan di 2018. Prijsnan di fruta a experiencia un incremento di 4,0 porciento di januari pa februari 2018 (luna compara cu luna) relata na e ciere di e frontera Venezolano pa comercio cu Aruba. Inflacion ta anticipa pa sigui subi, debi na e subida di e BBO y e BAZV desde 1 di juli 2018.

Placa den circulacion a crece te cu Afl. 4.330,7 miyon na final di juni 2018. Esaki a causa di un expansion di Afl. 126,2 miyon di credito na e sector publico resultando di un compra di bono di gobierno door di banconan comercial. E desaroyonan den e posicion di reserva di divisa neto a keda riba e normanan tradicional monitoria pa e Comision di Maneho Monetario (CMM) di BCA. Reservanan a permanece adequa den e prome dos trimesternan di 2018. Credito domestico extendi na e sector priva a expande cu 0,8 porciento na Afl. 3.159,2 miyon na fin di e di dos trimester di 2018 compara cu e di cuatro trimester di 2017.

E deficit financiero (a base efectivo) di Gobierno di Aruba a mehora te na Afl. 2,9 miyon, of −0,1 porciento di PDB, pa e prome mita di 2018. Entradanan a mustra un crecemento significante, subiendo cu 10,9 porciento (+Afl. 65,7 miyon), compara cu e prome mita di 2017. Expansionnan, tanto den entradanan di impuesto como entradanan no relata na impuesto tabata e empuhenan principal di e crecemento den entrada. Mihor cumplimento a yuda fortifica e coleccion di entrada di impuesto, yuda den cierto grado tambe pa e esfuerzo continuo di e Oficina di Impuesto pa colecta impuesto atrasa. E salto den entradanan no relata na impuesto ta atribui pa mayor parti na entrada di dividendo mas halto di companianan estatal (+Afl. 49,6 miyon). Gastonan a cay un poco cu Afl. 4,9 miyon te na Afl. 675,2 miyon den e periodo bou repaso, ya cu gastonan di Fondo di Desaroyo a para cu terminacion di e fondo. Debe di gobierno a yega Afl. 4.178,9 miyon. Como resultado, e tasa di e debe‐na‐PDB a yega
85,6 porciento na final di e periodo, 1,2 punto di porcentahe mas abou cu na final di 2017.


Fuentenan: BCA, AHATA, ATA, CBS.

E publicacion completo ta disponibel riba BCA su website (www.cbaruba.org).

2

Comments

comments