Recientemente e agencia di ratings ‘Fitch’ a publica su rating pa pais Aruba. Segun parlamentario, Sra. Jenifer Arends- Reyes, Aruba a logra mantene su rating di BBB- cu ta nifica cu Aruba su desaroyo a keda uno positivo. Den e relato publica a duna di conoce cu un factor determinante pa cu pa e rating ta nos turismo stabil. Turismo di Aruba a conose den su prome kwartal un desaroyo positivo pa cu su mercado principal. Aunque cu conforme e proyeccionan di ATA nos sa cu e mercado di Venezuela lo conose un caida y cu e mercado Norte Americano lo mester por compensa pa e caida aki.
Mas aleu e parlamentario ta acentua cu Aruba Tourism Authority tabatin un meta pa yega un crecemento di 5% pa Merca y a logra un crecemento di 7.7% cu ta 2.7% mas cu locual a ser proyecta pa e promer kwartaal di 2017. E mercadonan secundario di Latino America y Europeo tambe a conoce un crecemento. Tambe cifranan cu bon pa menciona ta esunnan di e grado di ocupacion di camber cu a subi cu 5.6% den e prome kwartal di 2017. Tambe e rendimento pa kamber di hotelnan cu ta e REVPAR a subi cu 6.7%. Recientemente comision di Turismo a reuni cu ATA pa dos presentacion importante cual ta un bista ariba e reportahe annual di aña 2016 cu a duna e miembronan di comision un bista ariba algun factor importante. Tambe a duna cifranan di e ultimo kwartal pa 2016 segun Banco Central pa asina nos tin un bista ariba e rendimento y contribucion di Turismo na nos economia. Como conclusion por bisa cu e contribucion a keda stabil cu un diferencia di 1.3% compara cu 2015. Nos a keda na 2.9 biyon florin. E resultado aki sigur ta uno positivo mirando e caida drastico di e mercado di Venezuela. Tambe durante e reunion aki a trece dilanti cu den e mercado internacional y riba e website mas grandi cu ta facilita Turismo cu ta Expedia Aruba ta rank den e top 5 nan di destinacionnan mas popular pa vacacion.
Pa aña 2017 lo sigui traha ariba diferente punto di atencion incluyendo e diversificacion di mercadonan como cu e situacion na Venezuela no a mehora. Nos Turismo crucero si sigur lo conoce un di su miho añanan pa 2017 caminda cu ta premira cu lo surpasa e 700 mil pasaheronan cu kibra e record di aña 2013. Tambe durante e reunion cu ATA a splica cu nos Turismo crucero tin su limitacionnan mirando cu tanto nos infrastructura pa abarca ‘mega ships’, lo mester mas profundidad den e canalnan y tambe piernan mas robusto pero tambe e capacidad di transporte, nos beachnan y shops tin cu duna servicio tanto na esnan cu ta bin cu avion como esnan cu ta bin cu crucero y den futuro cercano lo mester plania ariba esaki den caso cu Aruba tambe lo kier bai den e direccion pa ricibi barconan mas grandi. E di dos presentacion tawata tocante e resultadonan preliminar di cu ‘mira pa futuro’ y akinan por a wak confirmacion di locual ta e direccion cu nos Turismo lo mester bai, en corto e ta mas calidad y menos cantidad. Banda di esaki mester tene na cuenta e calidad tambe cu ta brinda na e trahadornan, trahadonan contento lo duna un mas mihor servicio ainda cu locual nan ta dunando. Por ehempel e pago pa mesun trabou ainda no ta igual na tur hotel y mester wak con ta yega na esaki y diferente otro punto mas di atencion cu lo mester keda central ora ta papia di calidad di Turismo y servicio, segun Parlamentario Sra. Jenifer Arends- Reyes