BEIJING, China- Gobierno Chines na 2015 a caba cu e famoso politica di un solo yiu cu el a implementa mas di 30 aña pasa pa controla e superpoblacion di e pais. E problema no a wordo soluciona, pero esey ya no ta preocupa e gigante Asiatico. Es mas, China ta pretende di fomenta famianan numeroso. Motibo? E ehecutivo a ripara cu mas man pa traha ta necesario.
Door di e situacion aki, tin un negoshi en especial cu probablemente lo sali ganado: e turismo di fertilidaed. E muhenan Chines kier haya yiu y hopi di nan ta recuri na companianan specialisa den e cuestion pa concebinan.
Na 2016, China tabata tin mas di 40 miyon pashent cu problemanan di fertilidad segun e Comision Nacional di Salud y Planificacion Familiar di China. Mas di 40 miyon di potencial clientenan pa un mercado cu lo por crece mas den e proximo añanan. Dos aña pasa, e mercado interno Chines di servicionan di fertilidad a yega te cu 670 miyon dollar. Na 2022, e cifra lo aumenta te cu 1.5 biyon dollar segun datonan recogi pa Bloomberg. Mas di e dobbel.
E turismo di fertilidad, cu ya ta un realidad, lo wordo reforsa cu e liberalisacion di e limitenan Chines na e tamaño di famia. E muhenan di mas edad, cu un of dos yiu, lo por busca un di tres.