Sra. Jennifer Arends-Reyes den calidad di presidente di comision di Turismo tabata presente hunto cu mas miembro di e comision Parlamentario, caminda e comision a haya dos presentacion extenso tocante e reportahe anual di 2016 di e rendimento di ATA y con Aruba como destinacion a ‘perform’. Tabatin diferente punto cu a sobresali, manera e mercado di Venezuela y su caida cu tawata uno drastico pa Aruba como cu Aruba ta e destinacion turistico nr.1 pa Venezuela compara cu otro islanan den Caribe. ATA Aruba Tourism Authority a percura pa inverti mas fondo den e mercado Norte Mericano pa asina compensa e caida di Venezuela. Tambe un aspecto importante tawata locual cu Turismo a contribui na e economia di Aruba den 2016. Aruba tin un dependencia hopi grandi ariba Turismo y 2.9 biyon di florin ta un suma hopi significativo pa Aruba. Pesey e strategia y maneho di destinacion ta hopi importante pa Aruba. E strategia cu a uza pa pone mas enfasis ariba e mercado Norte Americano a funciona huntu cu e crecimento di mercadonan den Latino America cu no mester di Visa mas manera Colombia y Peru. Colombia y Peru a crece den cantidad di bishitante pa Aruba y esaki ta algo positivo. Un otro punto tambe cu a bin dilanti ta cu e grado di ocupacion di nos hotelnan a keda semper halto. Aruba como destinacion mester keda enfoca ariba calidad y esaki tambe tawata e caso pa 2016. E balansa entre prijs, grado di ocupacion, volumen y locual nan ta gasta na Aruba ta keda importante. Cada factor cu baha ta trek otro kiermen e mester percura pa tur factor keda den balanse. E turismo crucero tambe ta uno cu tin desaroyo positivo. Tambe e comision di Turismo a ricibi un presentacion en corto ariba e futuro di Turismo den e forma di e Destination Development Plan. Y basicamente mester keda enfoca ariba calidad, experiencia y organisa eventonan cu ta autentico y cu ta atrae gruponan specifico Sra. Arends-Reyes ta termina bisando.