Diahuebs den oranan di mainta e presidente di Comision Grot di Lourdes manera semper ta bay habri e porta di e lugar pa asina devotonan cu kier bay haci nan oracion por drenta y yega mas cerca di e altar. Pa su sopresa ora cu e la yega e la bin tuma nota cu algo no tabata normal, despues di un rato a bin ripara cu antisocialnan lo mester a subi na e palo di lusnan di Elmar y a corta tur e cablenan y bay cu nan.
Aki ta trata di hendenan cu sa kiko nan ta haci como cu e cablenan aki ta di voltahe halto y un descuidao e persona cu a subi pa cortanan por a wordo electrcuta y lo por a perde su bida. Ainda ta fresco den nos memoria con aña pasa un director di un compania di advertisement a subi cu un manlift na altura di Garage Cordia y a dal den e wayanan aki y a perde su bida di biaha.
Mientras tanto personal di Elmar a wordo poni na altura di e caso y nan a presenta pa asina evalua e daño cu ta basta grandi, como cu a bay cu waya di por lo menos 3 pa 4 palo di lus.