E siman aki, e comunidad di Greenfield (Indiana, Merca) a uni na un procesion emotivo p’e iglesia Brandywine pa honra e memoria di Sammy Teusch, un mucha di dies aña cu a kita su bida despues di a sufri bullying escolar. Aunke e entiero a tuma luga riba diaranson, e noticia tragico ta sigui resona den e localidad.
Sammy Teusch a suicida dia 5 di mei ultimo, un acto teribel cu a laga su famia kibra. “Mi tabatin’e den mi brasanan. Mi a haci loke ningun tata mester haci y cada biaha cu mi cera mi wowonan, ta tur loke mi por mira,” su tata, Sam Teusch, a comparti visiblemente afecta. “E tabata mi yiu chikito. E tabata mi baby. E tabata esun mas chikito,” mama di Sammy, Nichole Teusch, a agrega.
E famia a revela cu e acoso cu Sammy a experencia a cuminsa aña pasa den scol basico y a sigui den e scol Intermedio Greenfield, caminda cu el a ricibi burla pa su apariencia fisico, hasta den e bus di scol. A pesar di e intentonan di su mayornan pa atende e problema cu e scol, e acoso a persisti y a extende riba red social.
Mientras cu e comunidad a uni den e duelo p’e perdida tragico aki, tambe ta lanta un combersacion riba e importancia di atende bullying escolar y brinda sosten na esunnan cu ta sufri di dje. Caso manera esun di Sammy ta doloroso, tambe ta sirbi como recordatorio di e necesidad pa crea ambiente escolar sigur y compasivo pa tur mucha.
Desde Aruba, caminda no a reporta hopi caso di suicidio relaciona cu bullying, si ta reconoce e presencia di e problema aki na scol. Autoridad y e comunidad ta traha activamente pa preveni y atende bullying, promoviendo tolerancia, respet y empatia entre e studiantenan. E tragedia di Sammy Teusch ta recorda nos e importancia pa sigui lucha contra acoso escolar den tur su formanan, garantisando cu tur mucha por crece den un ambiente sigur y amoroso.