Scolnan bandona y scolnan cu a wordo neglisha tur e añanna aki, lo ricibi e atencion cu nan merece e aña aki mes, segun minister di Enseñansa, Sr. Rudy Lampe, cu ta elabora mas ariba esaki.
E infrastructura mester di mantencion, y no ta solamente Frere Bonifacius of St. Aloysius cu nan a bishita ora cu nan a cuminsa como minister. Pero tin mas scol tambe cu merece atencion debido. E plan ta pa lo mas posibel, pa e aña escolar nobo, pa e fecha aki, ex Tarcisius school, Frere Bonifacius lo por cuminsa e aña escolar nobo eynan. Frere Bonifacius ta un di e pilarnan di enseñansa digital.
Minister di Enseñansa a papia cu minister di Infrastructura y a palabra cu lo mester bay traha den direccion di e independisacion di scolnan for di directiva di scol. E directiva di scol lo haya un parti di e responsabilidad y recurso necesario y zorg pa e mantencion di e scol tambe, y no depende 100% di un servicio manera di DOW, ya cu mas centralisa e ta, e ta tarda mas y ora ey no ta reacciona na tempo, cu a keda discuti cu Sr. Otmar Oduber, minister di Infrastructura.
Pa loke e ex edificio di Frere Bonifacius, tabata di idea cu e edificio tabata di SKOA cu gobierno mester mantene, cu a keda di pasa esaki pa Universidad y a resulta cu no ta bay mas, ya cu e edificio ta di Obispado. Minister a splica cu e prome informacion cu a haya for di Kadaster ta cu e edificio ta di Land Aruba. Pero pa constitucion, iglesia catolico tin e derecho pa tin enseñansa catolico y e ta wordo subsidia door di gobierno.
Dene caso aki, nan tin e propiedad caba y ta mas cu logico cu ta sigui apoya enseñansa catolico na e propiedad aki. Pa esey a reuni cu Universidad cu tabata tin miras ariba e tereno aki, pa ampliacion. Awo lo reuni cu e instancianan concerni, pa e dependance di Maria College, cu por dreche, na Augustus, e klasnan lo pasa pa eynan. E parti cu no ta renovabel, den futuro lejano mester wak pa bin cu’n plan pa haci uzo di henter e tereno. Pa awo lo haci uzo parcial di e tereno entrante Augustus 2018, pa un dependance di Maria College MAVO.