Diadomingo anochi, cu caracter di urgencia, Gobierno di Aruba a yama un conferencia di prensa extraordinario. Prome Minister Mike Eman, hunto cu colega Minister Benny Sevinger y funcionario di diferente instancia y departamentonan concerni a duna informacion di e ultimo desaroyonan relaciona cu un oil spill cu a origina na Trinidad y cu a move direccion pabou, direccion di islanan ABC. E ultimo informacionnan ta basa riba datonan ricibi for di avionnan di observacion ta bin ta siguiendo e mancha.
Prome Minister Mike Eman a splica cu e informacion ricibi te cu e ora ey ta mustra cu e mancha no ta uno grandi mas cu por tin consecuencia grandi. Loke a constata ta cu tin partinan chikito cu lo keda drif y cu por yega costa di Aruba. Ta vigilando e situacion cu hopi atencion cu ayudo di, entre otro Warda Costa.
E prome señalnan cu Aruba a ricibi a bin di Boneiro y e mandatario mes a combersa cu Gezaghebber di Boneiro, kende a splica cu na diferente sitio tabatin ‘aanspoeling.’ E marcanan di crudo pisa cu a yega na e costanan banda di Lak ta di 10 pa 15 centimeter.
Basa riba esaki Gobierno a contact Rampenbureau y Kustwacht. A wordo informa cu for di avion, no por mira e manchanan ya cu nan ta chikito. E prome melding cu a drenta tabata na boca di Wariruri, unda a haya patchnan grandura di un florin, y den oranan di atardi a haya patchnan mas grandi, di e mesun tamaño cu esunnan na Boneiro. Sr. Kiridongo di Kustwacht a bisa cu no a haya melding di costa zuid, pero den curso di dialuna mainta ta cuminsa haci un control.
Prome Minister Mike Eman a bisa cu e trabounan cu mester wordo haci lo ta hopi, si e cantidad grandi di patchnan cu yega costa ta basta. Pa e motibo aki a envolvi mas tanto instancia posibel. Ademas di practicamente tur hefe di servicio cu a wordo poni na altura, a reuni cu entre otro Polis, ATA, Cuerpo di Bombero, DOW, Directie Scheepvaart, Warda Costa Reino Hulandes pa e teritorio Caribense, Departamento di Naturalesa y Medio Ambiente, Parke Arikok y Departamento Meteorologico Aruba. Tambe a tuma contacto cu Comandante di Marinierskazerne “den caso cu mester di refuerso den e proximo dianan pa control y limpiesa di e costanan”.
Durante reunion a sali na cla cu ta dificil pa pronostica cuanto y ki ora lo haya e efecto. Loke a haya awo, segun e informacionnan cu a drenta, ta trata di un crudo basta diki, cu a pega riba piedranan y ta duro pa kita. Pesey den e reunion a pone e parti di limpiesa bou encargo di DOW cu ta e instancia cu ta encarga pa coordina esaki. E vigilancia y limpiesa na bocanan ta keda na encargo di DOW hunto cu Serlimar y Parke Arikok. Ta calcula cu e azeta ta yega den pidanan chikito. Tin informenan di manchanan chikito na Boca Prins, Dos Playa, Boca Wariruri, Andicuri y Natural Bridge. Henter e area panort di Aruba por wordo afecta cu loke yega costa. Na Venezuela el a dura 7 dia pa yega costa.
Gobierno kier inicia cu e limpiesa bou guia di profesionalnan cu ta duna tur conseho necesario di kico mester tene cuenta ora di haci e limpiesa, entre otro proteccion di esnan cu ta haci e limpiesa. Si e trabou bira hopi, ta haci apelacion riba comunidad y boluntarionan.
“Ta importante pa nos ta completamente prepara. Na Boneiro ponemento di boei no ta funciona, ya cu e ta un tipo di petroli asina pisa cu e ta bou di e nivel cu boeinan por intercepta. P’esey mester ward’e yega cerca pa mira con pa actua. Toch a pidi expertonan pa unda lama no ta bruto, evalua si por uza boei. Na Boneiro no por a uza ningun boei, pasobra no tin boei di e largura di e isla pa pone bou di e nivel di lama,” Prome Minister Eman a bisa.
Ta importante pa actua lihe asina cu e patch yega na e beachnan pa minimalisa e daño. Tambe por vigila e situacion pa parhanan, mas ainda cu Aruba ta den epoca di broei, dilanti costanan di refineria. Esaki lo haci e trabou mas complica, si e petroleo yega. Aruba tin entre 20 pa 25 mil parha cu ta pone webo den e temporada aki. Pesey a envolvi tur NGO y unda cu a bisa cu mester proteha tanto parha como e webonan durante e limpiesa. Aunke cu indicacion cu e daño ta minimal, no por baha e guardia.
Ta pidi comunidad pa keda pendiente por si acaso mester di mas boluntario. “Miho nos ta prepara pa e pio cu nos no ta prepara. Pesey nos ta haci e trabou den bon contacto cu medionan di comunicacion,” Eman a bisa.
Dia 23 April ultimo tabatin un oil spill na Trinidad unda cu cantidad grandi di crudo a bay lama. Esaki a keda flota bin direccion pabou.