Recientemente Ing. Albertico Koolman a wordo nombra oficialmente como director interino di NV Elmar, cu ta splica kico ta e retonan su dilanti.
Ing. Koolman a cuminsa na splica cu como director e tin varios reto su dilanti. Aworaki cu ta bay tin un temporada unda cu lo mester bay evalua tur cos cu a keda pending y purba di tackle esakinan, uno pa uno. Tabata tin un temporada unda cu tabata tin hopi intrankilidad laboral y esakinan ta wordo ampliamente discuti den prensa. Tin hopi trankilidad aworaki y esaki ta primordial pa Elmar. Y esaki ta loke a boga pe, pa tin trankilidad den e compania. Mester pone tur cos ariba papel y asina bin cu’n maneho.
Pa loke ta e trahadonan cu tabata sali cada rato den protestanan, ing. Koolman a bisa cu e trahadonan tabata boga pa un CAO nobo, aunke e CAO ta caba na 2020. Pero staff tambe tabata tin diferente problema y nan tambe tabata kier un CAO. Pero lo bay reuni cu esakinan tambe pa wak kico ta e espacio cu tin y wak con ta bay cuminsa cu esaki. Ta hopi cos pending y mester prioritisa nan pa asina tiki tiki cuminsa tackle esakinan.
Semper tabata tin storing y esakinan lo keda bin. Tin hopi mantencion pa haci, aunke tin areanan cu merece un tiki mas atencion y esaki lo haya e atencion necesario. Pa esaki lo traha ariba un plan y structura esaki bon, pa bay haci’e.
Tin hopi area unda cu tin liñanan ariba tera y esakinan hopi biaha ora cu tin yobida cu mal tempo, semper esakinan ta e areanan cu ta cay afo. Esaki no por wordo evita. Pero areanan cu ta mas cerca di lama, lo haya nan debido atencion tambe.
Pa loke ta barionan cu tin falta di lus, un paar di aña pasa a cambia tur e lusnan di caya pa lusnan smart y esaki ta comunica internamente cu Elmar, unda cu Elmar mes por wak cual mester cambia.
Cayanan cu tin lus caba, esakinan a wordo cambia caba. Y si tin paga, esakinan lo wordo cambia. Y areanan cu no tin lus ainda, esey ta otro proceso, y ora hayanan for di gobierno pa pone, lo haci esaki tambe. Awendia tur e lusnan a wordo cambia pa lusnan LED y esakinan ta saca mesun claridad y tin biaha mas claridad cu e bieunan.
E reto di NV Elmar mas grandi ta e CAO cu ta caduca na 2020, pero mester cuminsa prepara na tempo. Loke kier haci ta pa cera un CAO pa un temporada largo pa asina tin trankilidad laboral.
Pa loke ta e situacion financiero, Ing. Koolman a bisa cu ainda e falta pa profundisa su mes den dje, prome cu e por duna informacion ariba esaki.
TIn un demanda grandi pa meternan prepago, cual tin dos tipo. Tin un meter prepago y esun postpago. E prepago por wordo cumpra y e postpago ta esun cu ta haya recibo fin di luna. A manda bestel esakinan pa otro aña caba. Clientenan cu a manda pidi un meter prepago, Elmar ta haci un cambio administrativo pa asina cumpli cu deseo di cliente. TIn un tempo di entrega hopi largo pa e meternan aki.
Por ultimo Ing. Koolman a bisa cu e ta sinti cu e trahadonan ta para su tras y pa hunto traha pa tin un compania sano, pa hunto haci nan trabao na bienestar di e comunidad di Aruba, pa e añanan binidero.