Fiestanan di fin di aña ta un tema di tur aña, y diripiente yen di fiesta ta sali. Sra. Liliana Rasmijn, vocero policial ta amplia mas ariba e tema.
Normalmente tur aña, ta Minister di Asuntonan General ta duna permiso pa e tres dianan (25,26 y 31 di december) keda habri te un poco mas laat. Pero e aña aki, al parecer lo ta den man di Minister Andin Bikker. E mandatario di Husticia ta esun cu lo mester saca e comunicado. Y e lo mester saca e comunicado, na unda cu e tres dianan aki, e ta duna e orario te ki ora e tiendanan por keda habri y nan mester por cumpli cun’e, no tin excepcion. Esunnan cu no a pidi nan vergunning na tempo, ya caba nan ta laat, pasobra ta papia di 10 dia di trabao.
Promotornan no mester bin cu fiestanan diripiente, ya cu polis haya sa, nan ta bin y para e actividad. Hopi biaha e actividad na e luga, no ta Cuerpo Policial so ta bay ta eynan, tin Brandweer, DTI, unda ta bay wak e siguridad. Brandweer ta controla, si tin suficiente salida.
Awendia tin hende cu pa gana un tiki placa, ta traha un fiesta den pura y sin vergunning. Y si e promotor sigui toch, e lo mester atene su mes na e consecuencianan.
Popular ultimo temponan aki, ta fiestanan grandi na casnan den bario. Pa esakinan ta depende di ki ora ta haci e fiesta, y mayoria di biaha esunnan cu ta haci e fiestanan aki tin nan papelnan na ordo. Unabes cu cuminsa cobra pa entrada, e ta bay man den man cu’n vergunning. Si no tin vergunning, polisnan ta para e fiesta, esaki tin consecuencia. Tur cost a mara na ley, semper tin algo cu por tin su consecuencianan cun’e. Te asina leu, Sra. Liliana Rasmijn, vocero di Cuerpo Policial.