Recientemente ing. Junior Tromp, cu ta director di St. Fundacion Facilidadnan Deportivo, den cuadro di manejo di nos Ministro di Deporte a duna un presentacion na e hunta di directiva di St. Fundacion Lotto pa Deporte esaki relaciona cu e trabounan di construccion, renobacion y mantencion cu ta wordo hasi na e acomodacionnan deportivo cu ta cay bou di e maneho di St. Fundacion Facilidadnan Deportivo.
Centro Deportivo Frans Figaroa
Mester bisa cu e trabou mas grandi awor aki ta tumando luga riba Centro Deportivo Frans Figaroa na Noord. A cuminsa cambia e dak di e tribuna mientras e trabounan di mantencion y verfmento a inicia. Tin un carga grandi di plachinan di hero pa e dak cu ya caba a sali for di Alemania y ta spera cu dentro di tres siman esakinan lo ta na Aruba. A manda busca un scoreboard completamente nobo cu awor ta na Miami y otro siman lo ta na Aruba. Asina cu finalisa e trabounan riba e dak lo instala esaki. Na e edificio di Angel Botta tin algun reparacion mester wordo hasi pa asina garantisa e seguridad di tur cu ta frecuenta e edificio aki.
Segun sr. Tromp pa seguridad di un y tur y pa sigura cu tur e trabounan bay sin ningun obstaculo lo mester sera Centro Deportivo Frans Figaroa na Noord pa un temporada di tres siman maximo. Ta spera cu e trabounan keda cla rond di 19 di mei proximo.
Tereno di futbol Jose Wever na Yara
Na e tereno di futbol Jose Buchi Panama Wever na Yara tambe ta finalisando cu algun trabounan cu e keda pendiente. E trabou di verfmento ta esun mas grandi y esaki ya a inicia. E tralie nan rond di e compleho tambe lo bay wordo poni. Segun sr. Tromp lo mester hasi algun cambio door di Elmar, DOW y DIP pa cu e instalacion y coneccion di coriente na henter e compleho, incluyendo e poste nan di luz. Por ultimo rond di e stadion lo basha graniet.
E demas complehonan restora bou di FFD
Na e stadion di Crismo Angela/Nadi Croes tambe lo hasi cierto trabounan riba e dak unda lo cambia e plachinan pa uno nobo.
Na Parke Curazon Jaburibari a constata algun caminda unda tin e asina yama ‘sinc holes’. Lo cuminsa tambe cu algun trabounam di mantencion riba e edificio unda nos grandinan ta haci ehercicio. Por ultimo riba e pacour tin awa ta para y pronto lo busca un solucion pa cu esaki.
Na e parke di baseball/softbol na Pos Chiquito ta hibando combersacion cu DIP esaki pa e “meetbrieven” y e traspaso di ambos compleho pa FFD. E ultimo compleho cu lo hasi algun trabou di mantencion preventivo ta Joe Laveist Sport Park y aki lo cera e cancha di basketball pa un renobacion completo pa asina scolnan den bisindario por haci uso di esaki.
Asina nos por mira cu tin diferente trabounan di construccion, renobacion y mantencion ta tumando lugar riba e accomodacionnan deportivo cu ta cay bou di e maneho di St. Fundacion Facilidadnan Deportivo. Un danki na Minister di Deporte su vision & aporte pa cu e facilidadnan deportivo.