Durante un conferencia di prensa yama pa Departamento di Salubridad Publico, a splica riba un accion di registracion pa tur cuidado di salud registra nan mes. Leslie Escobar di seccion di asuntonan huridico y registracion di cuido ta splica cu a bin ta traha pa mehora cuido na Aruba. Den cuadro di mehoracion di e calidad di cuido na Aruba y pa por garantisa e calidad di cuido na Aruba, e ley di calidad di cuido a wordo traha. E tabata un proyecto hopi largo cu a keda aproba fin di aña 2014 y e ley aki a drenta oficialmente na vigor na Januari 2017. E ley nobo aki ta trece cun’e obligacionnan huridico nobo cu a wordo crea pa mehora e calidad di cuido na Aruba. Un di e obligacionnan huridico nobo aki ta e obligacion pa e instancianan di cuido na Aruba registra nan mes na departamento di Salud Publico.
Pa e motibo aki Departamento di Salud Publico ta bay ta acercando tur instancia di cuido den e dianan cu ta bin pa nan por registra. Departamento di Salud Publico lo ta mandando un email na cada instancia di cuido, caminda cu e instancia di cuido lo haya como attachment den e email un carta oficial di Departamento di Salud Publico, cu e peticion pa e instancia di cuido aki registra nan mes dentro di un periodo di 2 siman.
Escobar ta sigui splica cu e email nan lo ta hayando un formulario di inscripcion, caminda cu ta pidi e instancia di cuido pa por yen’e y pa mand’e bek na Departamento di Salud Publico, hunto cu e documentonan cu ta wordo pidi como anexo (bijlage). Den e dianan venidero, Departamento di Salud Publico lo ta acercando tur instancia di cuido individualmente pa medio di e email, cu e peticion pa nan registra. Si tin un instancia di cuido cu den e di dos siman di Augustus no a ricibi ningun email for di Departamento di Salud Publico, ta pidi pa e instancia di cuido aki acerca e departamento e ora.
Segun definicion di ley, ta basta amplio cu locual ta cay bao di un instancia di cuido, manera Hospital, Imsan, dokternan di cas, praktijknan di specialista, boticanan, laboratorio, praktijknan di dentista, tur esakinan ta cay bao di instancia di cuido cu tin e obligacion legal pa registra y cu lo ta acercando den e dianan cu ta bin.
E obligacion nobo aki ta pa e negoshi registra. E instancia di cuido y naturalmente ta pidi cierto informacionnan na e instancianan aki cu nan tin cu duna. Esaki ta un registro, en principio di instancianan di cuido. Tin caba un registro di profesionalnan di cuido, cu lo wordo cambia den futuro tambe pa cumpli cu e ley nobo. Pero esaki ta en principio un registro di instancianan di cuido.