Riba dia di bestia sigur Philip’s Animal Garden no por a keda afo. Propietario di e luga, Philip Conrad Merryweather, a splica di e dia aki, como tambe di nan evento cu nan lo bay tin durante e fin di siman cu ta bin.
Pa Philip, e bestianan ta prome cu tur cos y nan lo bay celebr’e den grandi, tanto diasabra y diadomingo. Tur hende ta invita pa bin pasa un dia ameno. Ta bay tin Dino Jump, facepainting, pa e muchanan pasa un dia dushi y educativo.
Entrada ta 3 florin pa persona, pero Dino Jump y facepainting ta por nada. Una bes bo drenta ta pa henter dia.
Merryweather a splica cu e problema mas grandi cu tin mundialmente ta tur hende cu kier un bestia ora nan ta chikito. Prome cos cu ta tende, cu si un bestia crece nan kier regala. Si bo tin di busca un bestia, percura pa kier’e di ora e ta chikito te ora cu e ta grandi. E ta conta pa tur tipo di bestia.
Hopi hende ta haci un fout ora cu un cacho cay na estado, ya diripiente nan no kier’e mas. E no ta cacho su fout cu el a cay na estado. Si oper’e for di principio, nada no lo pasa. Percura pa bo bestia for di dia bo hay’e te na final, lo bo no ta bay tin problema.
Philip ta colecta tres pa cuater bestia tur dia. Tur dia tin algo. Yamada cu nan ta haya ta inmenso. Burico den cura, gans den cura, pato den cura, tur tipo di cos.
Mensahe cu Philip tin ta cu si bo tin pensa di busca un bestia, stim’e for di chikito te na final. Sino, no busk’e.