Durante un conferencia di prensa di gobierno cual a tuma luga diahuebs mainta, a hiba palabra tambe Sra. Trudy Hassel, di Migracion Aruba, unda el a elabora ariba e trato di detenidonan.
Sra. Hassel a cuminsa na bisa cu e trato cu tur persona cu ta wordo deteni, door di Guarda Nos Costa of Cuerpo Policial, ya cu nan tambe tin autoridad pa haci esaki den cuadro di LTU. E personanan aki ta wordo treci na Guarda Nos Costa pa nan por wordo controla debidamente si nan tin nan permiso valido si of no. Y tambe tin esunnan cu ta pidiendo asilo, mester wordo controla cu si ya caba nan a pasa door di e proceso cu nan a wordo scucha primeramente. Y si un relato a wordo manda pa e comision cu tin cu dicidi ariba nan proceso.
Durante varios ocasion, nan a topa cu personanan cu ta cana rond cu documentonan di peticion di asilo, cu no a wordo ni scucha door di personanan encarga pa traha e prome relato di nan peticion. Y a base di esey, nan ta wanta un rato, pa e persona por a haya su afspraak pa di biaha e wordo hiba, pa asina cuminsa e proceso legal cu ta para den e tratado tambe, pa cumpli cun’e. Pa locual cu ta trata cu e cuminda cu e personanan ta haya na Guarda Nos Costa, e gastonan pa cada persona ta suma entre 275 pa 350 florin. Ta depende di e estado di salud di e persona, pasobra cu si un persona por ehempel ta diabetico, e ta wordo trata segun cu dokter ta prescribi. Nan ta haya medicamento, prescribi door di dokternan y tur e personanan cu mester di atencion medico. Sea na Guarda Nos Costa mes of na hospital, ta haya esey.
Es decir, na tur momento, Sra Hassel ta reitera cu tur persona ta wordo trata conforme tratadonan internacional. Pa locual ta e cuminda, e personanan ta haya minimo dos pan pa dia. Ora di bisa minimo, e tin di haber cu e estado di salud di cada persona, pasobra cu tin hende cu door di nan estado di salud, mester di mas cu esey, y nan ta provee esey. Y banda di esey nan ta haya cuminda di catering. Na banda, e detenidonan aki ta haya juice. Y experiencia ta bisa cu nan no ta bebe e juice, pa despues nan ta bisa cu nan no a hay’e, pero ora cu nan controla, e detenidonan ta warda e juicenan pa bay cu nan den nan maleta. tabata tin un caso di un persona cu a save casi 50 juice pa bay cun’e.
Ta importante pa desbarata cu tur locual cu ta wordo insinua. Personanan cu ta haci aña durante nan detencion, nan ta haya tur libertad pa gosa, te unda permisibel, cu tur hende presente. Ta purba di comply mas leu cu nan por y aworaki tin e proceso unda cu tur atardi tin orario di bishita, y ta pensa di amplia e orario di bishita, pa asina mas ainda, duna oportunidad na famia y conocinan, pa por bishita, pa asina cumpli cu mas regla. Pero tambe e tin di haber cu mayoria di biaha, e personanan tin cu wordo hiba dilanti di hues comisario, p’esey no a implementa esaki ainda, pero si e ta na caminda, segun Sra. Trudy Hassel, di Migracion Aruba.