Tur cos ta cla pa e ley cu lo drenta na vigor dia 1 di Januari cu ta e tema di saco di plastick. Durante un conferencia di prensa yama na TNO Europe House a duna informacion riba e plannan pa 2017. Segun Omar Harms, awe a inicia oficialmente e campaña cu a bin door di e ley cu a pasa na Juni, caminda unanimamente Parlamento a bay di acuerdo cu e ley pa prohibi uzo di saco di plastick. E ley lo drenta na vigor, manera ya menciona dia 1 di Januari. Pa e motibo aki a invita partnernan pa anuncia e campaña. E motivador di e iniciativa ta parlamentario Donny Rasmijn, kende a splica riba e ley aki. Harms a splica cu tabata tin un video cu lo bay wordo uza pa e campaña di concientisacion pa asina e mensahe di pakico e ta malo pa uza saco di plastick yega mas cerca di e comunidad.
Tambe parlamentario cu a pasa e ley den Parlamento, Donny Rasmijn, a hiba palabra pa e tema aki cu ta importante. El a felicita pueblo di Aruba cu a yega na e punto cu por lansa e campaña pa combati saconan di plastick. Manera cu tur hende sa, despues di basta tempo di debati, sinta cu diferente stakeholder, partner, por bisa cu e grupo en particular, a carga e proyecto aki y e Parlamentario ta gradicido cu semper a sostene e parlamentario riba e parti aki y a logra yega te na e punto aki. Manera cu ta conoci, e ley aki a pasa na Juni den Parlamento y ta e intencion pa per 1 di Januari 2017, cu e saconan di plastick, ta wordo prohibi. Ta papiando aki di e saconan di plastick cu ta wordo uza pa uzo singular. Hopi tienda y supermercado ta haci uzo di nan, incluyendo hasta esunnan cu ta traha di biodegradable plastick material. E ta contene en todo caso plastick y tambe ta tuma su tempo pa decompose. E daño cu bo ta haci na medio ambiente ta keda y solamente un diferencia ta cu e ta decompose mas lihe, pero no por sinta warda lunanan largo pa e desintegra. E miho cos ta, pa prohibi’e por completo, segun e Parlamentario.