Despues di simannan di preparacion, tur cos a keda cla pa e gran Christmas Bazaar compaña pa un tremendo Festival di Sopi di movimento politico RAIZ. Diasabra 2 di december na YMCA Dakota for 5or y mey di atardi, e evento lo ranca sali cu musica y dushi cuminda tipico di pasco y local, manera e.o. un seleccion di diferente sopi bon gusta, ponche crema di cas, ham di pasco y hopi specialidadnan mas cu lo ta obtenibel na RAIZ su Christmas Bazaar. Bar y cushina lo ta bon surti. Mientras cu bo ta saboria bo dushi bebida of cuminda, por admira artesania di varios artesano cu ta forma parti di e mercado festivo aki. Bin sostene nos artistanan local y cumpra obranan di man y arte autentico di nos propio yiunan di tera.
Mientras mayornan ta cumpra nan regalo y decoracionnan di fin di aña, e muchanan por goza di weganan popular y educativo como tambe contamento di storia di Pasco door di escritora di buki mucha y miembro di RAIZ, Sra. Liliana Erasmus. Tambe tin un bunita Show di Pierewietje & Flash y un mago pa entretene nos publico mas hoben. Na final di e anochi lo bay tin un tremendo concierto di e Grupo di Gaita Muchanan di Mama Rosa cu lo cera e anochi den pleno spirito di fin di aña.
RAIZ su Christmas Bazaar ta un actividad pa famia henter cu musica den dushi ambiente di fin di aña!
“Fondonan recauda ariba e dia aki, lo wordo utilisa pa varios campaña informativo, educativo y innovativo pa nos comunidad, ful den style di RAIZ y manera pueblo a bin ta custumbra di nos.” Asina Sr. Ursell Arends lider politico di partido RAIZ a declara.
RAIZ kier diferencia su mes door di aloca fondonan na bienestar di e educacion di e pueblo di Aruba door di bin cu campañanan impactante cu por haci un diferencia.
Keda na altura di e ultimo desaroyonan di Movimento RAIZ bishitando nan Facebook Fanpage RAIZ Aruba como tambe nan website www.raizaruba.com