Pa loke ta e proyecto di Watty Vos Blvd cu lo cuminsa dilanti di Airport bay te na e hotelnan na Palm Beach, esaki lo start den luna di April segun Director di DOW Sr. Marlon Croes. Esaki lo fluha e trafico mas miho den area di Oranjestad. Esaki ta e plan grandi cu tin tambe cu movemento di containerhaven for di Oranjestad pa Barcadera y via e ruta nobo aki, por duna miho accesibilidad pa diferente partinan di e isla, na e manera mas sigur y mas rapido.
Ya caba a cuminsa cu e proyecto aki, pero e ground breaking lo tuma luga na final di Maart y comienso di April. Lo tin un periodo cu lo keda den fase transitorio pero ora cu e keda cla na 2019, e ora ey por wak cu lo tin miho capacidad pa e trafico di Aruba.
E proyecto aki lo consisti di shete kilometer di caminda nobo, cu ta den green field, dus e ta pasa pariba di Codemsa, drenta San Barbola cu no tin caretera y e ta haci esaki te ora yega na altura di Go Karting, y cay riba e caminda existente. Dado momento e lo crusa e caminda di Sta. Cruz, Paradera, Tanki Leendert y Bushiri cu Madiki. E ta bay crusa y eynan lo bin un crusada nobo y mayoria ta den forma di rotonde, di cual dos di nan ta un fly over. Asina por maneha e situacion mas miho. E lo bay tin un parti di reconstruccion, upgrading di caretera di Caya Ernesto Petronia, for di e rotonde di Sta. Helena bay noord, cu lo wordo conberti den rotonde, unda lo bay pone su embeyecimento.
Un parti hopi importante ta e continuacion di Linear Park, cu ta core for di crusada di Fatum pa Juancho Irausquin Blv, te cu Riu Antilla, cu lo mehora e crusada di Alhambra, haci esaki mas sigur. E ta un otro proyecto grandi y pa 2019 e Watty Vos Blvd lo keda cla. Esaki lo trece cambio riba L.G. Smith Blv y Oranjestad, pero tambe e caminda di Kibaima – Tanki Flip, unda lo haya un movecion di trafico cu lo haci uzo di e caminda aki y trece cierto alivio pa otro puntonan, segun Sr. Marlon Croes, director di DOW.