Tur reunionnan pa actividadnan pa Dera Gai a tuma luga, pa cual aki Sr. Stanley Dabian di Departamento di Cultura ta splica con e preparacion ta bayendo pa dia 24 di Juni.
Departamento di Cultura hunto cu Comision Celebracion Dianan Nacional, bou auspicio di Ministerio di Cultura, recientemente a reuni cu tur e centro di barionan y organisadonan cu ta haci diferente actividad tur aña ariba dia 24 di Juni. E reunion a bay den bon ambiente y asina e organisadonan a trece nan inkietud dilanti. Departamento di Cultura di nan banda a trece dilanti, con por yuda nan, na manera facilitario. Kisas den forma di contribucion, tent, baricada, Departamento di Cultura ta cla pa yuda.
Esunnan cu pa prome biaha ta bay organisa e actividad aki di Fiesta di San Juan, kisas tambe lo por haya un yudansa di Departamento di Cultura, cu un persona di nan organisacion lo por haya un guia pa un actividad ariba veld. Esun cu ta tene e guia di e actividad, cada biaha e ganado, e bailado, e musica y tur esey, pa esunnan nobo por haya guia ariba esey.
E dia di reunion ey, tur e instancianan cu tabata presente, a haya un formulario di cual Departamento di Cultura, pa entrega esaki prome cu diabierna 16 di Juni pa asina ey, esakinan por haya yudansa den e parti facilitario den e Celebracion Grandi di Nos Pueblo. Pero tambe kier a trece dilanti, na tur esunnan cu ta haciendo actividad pa dia 24 di Juni, pa no lubida di manda Sr. Dabiamn, informacion di nan programa, localidad etc pa email [email protected] pa asina Sr. Dabian por traha un calendar di actividad pa asina tur e medionan di comunicacion por publica esaki pa e pueblo por wak kico tur ta e actividadnan.
Sr. Dabian a enfatisa e importancia di ricibi tur informacion, no solamente pa traha e calendario, pero asina Departamento di Cultura por tene cuenta cu tin mas actividad y celebracion ta tuma luga den nos barionan. Pasobra e calendario di actividad cultural aki ta wordo haci ya pa varios aña caba. Esaki ta sosode ariba Dia di Betico, 18 di Maart y tambe Dera Gai. Asina e pueblo por core rond, hunto manera un famia pa asina nan siña conoce di nan celebracion tradicional aki, di nos folklore.
Pa hopi aña caba cu Departamento di Cultura ta haci nan proyecto anual, cu ta e proyecto escolar pa e celebracion di Fiesta di San Juan, Dera Gai. E aña aki, a haci esaki un siman largo. Y e ta bay tuma luga den Cas di Cultura. Esaki ta specialmente pa e scolnan Preparatorio y Basico. Sr. Dabian a a bisa cu den e celebracion aki, aña pasa, Departamento di Cultura a haci e Poppenkast bibo, unda e trece e celebracion pa e muchanan. E aña aki a keda dicidi cu ta haci e parti di e competencia di e baile, y e competencia di e canto di e gai. Lo tin premionan pa e muchanan cu participa, for di klas 1 te cu 3 y di 4 te cu 6. Asina ta separa e muchanan chikito for di esunnan mas grandi.
For di dia 20 te cu 23 di Juni, lo bay tin 2 presentación durante ora di scol. Uno ta 8 or di mainta, y otro 10 or di mainta. Aki varios scol y su alumnonan lo cera conoci un biaha mas cu e fiesta tradicional aki. Cu esaki Departamento di Cultura, ta trece esaki na e alumnonan na scol, pero tambe ta cumpli cu e parti di responsabildidad di celebracion di Aruba, mirando cu e celebracion di San Juan aki, na un manera unico. E ta existi ya caba for di basta aña, prome cu 1900.
E mainta ora cu e muchanan yega, nan ta wordo ricibi door di Departamento di Cultura, y den Cas di Cultura lo tin presentación pa nan. Tin un parti unda ta conta parti di e storia, sigui pa e competencia. E ganadonan lo ricibi un premio di parti di Departamento di Cultura.
Por ultimo, Sr. Stanley Dabian, kier a felicita su coleganan di seccion di Implementacion y tambe seccion di documentacion, cu pa aña ta haci e Proyecto Escolar y e muchanan ta gusta, y tambe e muchanan ta haya hopi informacion relaciona cu esaki.