E fin di siman aki Aruba Art Fair lo bay bira algo hopi grandi. Relacionista di Aruba Art Fair, Candy Rasmijn, a splica cu nan ta hopi entusiasma cu e ta na San Nicolas y cu tur cos ta tumando luga. Cayanan di San Nicolas a bira un plataforma di arte, caminda cu artistanan local y internacional ta haci un desplego di creatividad y ta haci un union entre artistanan, creando un plataforma, cual ta e vision principal di Aruba Art Fair, cual ta pa uni tur artista local y internacion. Cu e plataforma aki por wordo uza pa haci intercambio cu hobennan di Aruba cu por bay den exterior y hobennan di exterior por bin Aruba y pone e isla riba Google Map, como un plataforma di locual ta den e area di arte.
Ta invita e comunidad di Aruba pa bin y pa ta parti di e evento aki, cu lo tuma luga e fin di siman aki na San Nicolas. Por a wak caba cu tin diferente obranan di arte cu a wordo haci pa 19 artista internacional, unda nan a pinta diferente experiencia den e comunidad. Diferente cos di cultura di San Nicolas. Kier a invita pa tur bishita e website, facebook page, unda cu por tin mas informacion di tur e entradanan y tambe tur evento cu lo tuma luga e fin di siman aki. Asina aki tambe, Rasmijn a invita un di e artistanan cu awe ta celebrando su dia di independencia di Mexico. E ta Genaro Chilangos, kende ta di e grupo Chilangos cu ta trahando na e entrada di San Nicolas, un arte hopi bunita.
Pa e prijs di diferente dianan, riba diabierna, e fashion meet art ta 50 florin pa entrada. Esey ta solamente pa ta parti di e fashion show y di e evento cu lo tuma luga den e caya principal di San Nicolas. Pa forma parti di e auction dinner, cu lo ta na e rotonde di San Nicolas, dilanti di Nicolaas Store, ta $150 dollar. Pero cu esaki ta envolvi e fashion show y auction dinner. E fondonan recauda pa esaki, lo wordo uza pa crea plataforma pa manda e studiantenan di arte internacionalmente.
Locual ta trata diasabra y diadomingo, ta 10 florin pa entrada. Lo bay tin actividad pa mucha. Esey ta nifica cu ta algo pa uni e comunidad di Aruba y pa trece algo pa e famia di Aruba en general, pa por bin disfruta na San Nicolas.
Si kier cumpra e weekend pass, encerando diasabra y diadomingo, lo ta 15 florin. Esaki por wordo paga na entrada di Aruba Art Fair. Por cumpra ticket tambe na Valero Boulevard y na Superfood. E orario diabierna, e lo cuminsa pa 7’or di anochi y diasabra y diadomingo for di 6’or di atardi, e eventonan lo cuminsa na San Nicolas.