Aworaki tur cita pa haya carchi di salud mester wordo haci online. Subi riba www.dvg.com pa haci e cita. Mesora ta haya un fecha y ora pa acudi pa Departamento di Salubridad Publico.
Yvette Geerman di Departamento di Hygiene di DVG a splica cu tur persona trahando cu cuminda y bebida mester tin un carchi berde vigente.
E cita ta wordo haci online pero mester bay personalmente riba e fecha di cita cu un cedula of paspoort, un papel di cinco florin. E personanan cu yega sin e papel di 5 florin, na e departamento mes por saca e documento, pero e tramite lo costa 5 florin extra.
Na DVG ta haya e formularionan pa haci test, despues mester bay Finanza di Salubridad Publico pa haci e pago di 30 florin. Den dies dia despues di e procedura aki ta otorga e carchi di salud (carnet), si haci tur e testnan di biaha. E trahado mester tin e carnet aki durante ora di trabou. Despues di un aña mester renoba e carnet, sin cita, riba diabierna. Esaki tambe lo tuma dies dia pa e trahado ricibi esaki. Cada cinco aña mester haci test di torax di nobo
E carnet aki mester ta na ordo durante control, ya cu de lo contrario por haya un boet.
E demanda pa carchi berde ta hopi pa cual ta pidi tur hende pasenshi ora di cita, pero tambe pidi tur hende pa cumpli debidamente cu e cita, na ora.
Durante control, esnan cu no ta cumpli cu e regla, si e trahadonan no tin nan carnet, e luga por wordo cera y por haya un boet. Te ora cu tur empleadonan tin nan carnet, e ora por habri e negoshi bek.