Tur centro tin un tempo pa cuminsa traha mas riba e reglanan cu e lugar mester tin pa loke ta cuido di mucha pa cual aki Sra. Natasha Gilkes Pedagogisch Medewerker ta splica.
Sra. Gilkes a splica cu ta bon pa tur doño cuminsa busca mas informacion di e ley aki y tur lo tin un tempo pa asina haci e adaptacionnan necesario pa esaki. Pero den e lunanan cu ta bin, nan lo bin cu mas informacion. No warda te ora cu un fecha bini, unda cu e ley ta wordo implementa oficialmente.
Lo ta bon pa sigui cierto cursonan of cierto charlanan, cierto informacion, cuminsa haci esaki di aworaki caba. E ley por wordo haya ariba e website di parlamento di Aruba y ta disponibel pa tur hende cu kier wak esaki. Pero si como centro, bo kier mas informacion pa kico cuminsa haci pa prepara bo mes, semper por tuma contacto cu Fundacion pa Nos Muchanan y gustosamente lo duna e informacion necesario.
Tambe Sra. Gilkes a splica cu tin diferente centro cu ta haciendo un tremendo trabao aunke cu no tabata tin un ley di Kinderopvang y kisas nan no a sigui cu opleiding ariba e trabao di cuido cu tin actualmente, pero semper tin espacio pa mehoracion. Nunca por siña di mas. Pa e motibo aki, en berdad un di e punto cu Fundacion Pa Nos Muchanan lo sigui haci: sigui educa bo mes, engrandece bo conocemento y asina ofrece bo muchanan den bo cuido e miho cuido cu tin.
Tambe tin reglanan cu ta costa placa y ta bin e pregunta e ora con ta bay para cu esakinan, y Sra. Gilkes ta di opinion cu esaki lo depende di cada centro. Algun centro kisas lo no por cu e ahustacionnan y lo bay over pa cera su portanan. Pero tambe lo haya algun centro cu si ta dicidi di bay cu e ahustacionnan of adaptacionnan necesario pa keda habri.,
Fundacion Pa Nos Muchanan tey pa guia, nan tey pa engrandece e conocemento di e centronan y e centronana aki lo haya e tempo suficiente pa haci e adaptacionnan necesario.
E parti di control ta e parti cu eigenlijk Gobierno ta esun cu ta bay ta responsabel pa haci esaki, pero naturalmente den transcurso di e dianan binidero, e fundacion lo reunio tur e centronan hunto, pa asina duna informacion amplio na nan tur, di kico e ley ta encera y kico esaki ta bay nifica pa nan.
Basicamente tur e centronan mester ta pendiente di e fundacion y e centronan lo haya un invitacion via mail, pa un mainta informativo pa cu e ley di Kinderopvang.
E doño ta esun responsabel pa e centro y ta e ta esun cu ta haci e decisionnan. Pero tambe tur persona cu ta traha cu mucha, tin un responsabilidad. No solamente e lider, pero tambe e cabesante, e kokki, e chauffeur cu ta busca e muchanan y hibanan e centro. Paso con cu bay bin, e chauffeur tambe ta den contacto cu e mucha. Dus psey ta importante pa tur hende cu ta traha den e centro cu mucha, mester sa di CPR y EHBO, pa si algo pasa, esaki tambe lo por yuda e mucha cu algo, segun Sra. Natasha Gilkes, di Fundacion Pa Nos Muchanan.