Fin di Aña semper ta un temporada druk cual ta haci cu trafico ta aumenta. Esaki no ta na Aruba so, pero tur rond mundo, cu di september te fin di aña, tin mas trafico. Esaki tambe ta un temporada caminda cu contratistanan ta baha cu vakantie.
Director di DOW, Ing. Marlon Croes a manda carta pa tur compania di utilidad cu pa dia 15 di december, tur e trabaonan cu tin banda di caminda lo mester ta acaba y e buraconan, unda ta pone kabel den dje, pa asina durante dianan di fiesta, tur cos ta bon hinca den otro. Esaki ta conta tambe pa proyecto Watty Vos Blv, cu ta tumando luga, como tambe Caya Ernesto Petronia, for di WEMA pa rotonde Tanki Flip, esaki ta un trabao cu mester tuma luga den siman, pa finalisa esaki y lag’e atras den un forma responsabel. A purba caba cun’e den fin di siman, pero e trafico tabata asina druk, cu automobilistanan no tabata respeta baricadanan, cu contratista no por a keda cla pa cual lo sigui den siman.
Motta Engel y tur otro contratista mester caba cu nan trabaonan, pa asina trafico por keda core normal, durante dianan di fiesta. Y esey ta bay ta pa dia 15 y trabaonan na banda di caminda, lo mester keda cla pa dia 21 di december. Trafico lo mester sigui circula normal y DOW lo percura pa tur caya cu ta cera awo pa construccion, lo ta habri pa dianan di fiesta.
E trabaonan na rotonde di Cumana, tur hende sa di e experiencia cu e contratista cu su diseño no a funciona full. Ora cu awa yobe, e rotonde ta bay bou di awa, pa cual mester a cera e rotonde aki. DOW y gobierno ta poniendo basta presion ariba e contratista pa asina caba cu e partinan aki. Esaki a trece cun’e, cu lo bay coba ainda prome cu fin di aña ainda, pa pone e tubonan di awa, un tubo pabou di e rotonde ariba e caminda di Oranjestad y dos tubo den e caminda cu ta bin for di Sta. Cruz y asina por coy e awa, hib’e panord di caminda den e tereno cu ta e area di construccion, y asina ta prepara pa e no molestia cu si awa mester yobe, y e no inunda e rotonde.
Por ultimo, Ing. Marlon Croes, director di DOW a bisa cu meta ta pa diaranson awo e trabaonan akinan keda cla.