Tur beach cu a haya daño door di Matthew den 2016 ta hayando atencion pa asina drechanan back manera tabata pa nos hendenan local y bishitantenan disfruta di esaki. Sr. Marlon Croes, director di DOW ta amplia mas riba esaki.
Despues di Matthew tabata tin erosionnan cu a tuma luga y mas tanto den area di Divi/Tamarijn te na Manchebo, y caba na Eagle Beach. Otro beachnan, manera Rodgers Beach, Baby Beach, y Palm Beach tabta tin mas tanto molester di zeewier y hunto cu hotelnan, a haci esakinan limpi.
Unda tabata tin erosionnan grandi, DOW a drecha e beachnan, trecenan den bon estado. E parti di Divi/Tamarijn direccion Manchebo, aki tabata tin otro tipo di daño, aki e beach ta hopi mas activo cu e beachnan di Palm Beach. Pa e motibo aki, a sinta Alex Nieuwmeijer, di Divi, cu a pidi permiso pa saca santo for di lama mes, y spuit esaki bek pa e beach y drecha esaki.
A combersa cu DNM y hunto cu Directie Scheepvaart, el a haya e permiso pa spuit 25 mil cube di santo riba e beachnan di Divi Village y Tamarijn pa mehora e beach. Lo pone 2 sandpocket di 10 mil cube cada uno, pa ora cu e coriente di lama cambia, e mes ta coy e santo di e pocketnan di e beach, pa yuda naturalesa transporta e santo mas lihe.
DOW a bin ripara cu for di Manchebo, Casa del Mar, Aruba Beach Club, bin pa Divi Divi, e beach ta den hopi bon condicion, pero dos siman pasa tabata tin un swell atrobe, cu a causa cu na altura di Tamarijn algun piedra a sali atrobe.
A haci tur beach limpi pero sigur tin mas atencion pa duna pa wak kico por haci den futuro ora cu conoce cambio di naturalesa segun Sr. Marlon Croes di DOW a splica.
A puntra Sr. Croes, si kisas lo por traha un muraya di piedra, manera cu tin na varios otro beach di Aruba. Segun director di DOW, mester ta cauteloso cun’e ya cu Aruba economia ta draai ariba e beachnan. Cada structura cu traha cu un beach activo manera di Aruba, enbes di proteha esaki, lo bay daña esaki.
Actualmente ta bezig ta duna opdracht na Deltaris, di Hulanda, unda cu nan a traha cu DOW caba den decada di 80. Nan tin informacionnan con e beach ta, con e stroom ta comporta nan mes y base di esey ta bay traha un modelo pa Aruba, cu por simula.
A base di esey por simula y wak unda e problema ta bay sinta, cu si traha un structura di algo den awa, e ta mustra kico ta e consecuencianan, prome cu trah’e y pa sa cu ta proteha e beachnan. E intencion ta cu resultado di e estudio aki cu e modelo cu ta bay traha, ta pa Aruba ta bay hiba un maneho mas sostenibel cu e beachnan pa futuro.
E uzo di e beachnan, door di hopi turismo, ta grandi y conhuntamente cu e cambio den tempo cu tin, esey ta duna dolor di cabes pa cuida e beachnan y cu e modelo aki por simula y mitiga e riesgonan prome cu nan manifesta mes.
Cualkier gasto di traha structura, lo mester busca un partnership. Mester tene cuenta cu e beachnan di Aruba ta un acceso publico y por ehempel den e caso di Divi Village, pa duna un ehempel, e lo por bisa cu tin un suma reserva, y si mester traha un structura pa proteha e beach, e lo haci esaki. Cualkier partnership, mester ta na bienestar di Aruba y su comunidad, Sr. Marlon Croes di DOW a finalisa bisando.