Tin hopi bario di cas social rond Aruba cu ta cay bou di FCCA pa cual aki a puntra Franklin Leest si ta duna esakinan su atencion manera mester ta pa asina mantene e bario den un bon calidad di bida.
Barionan cu ta duna problema of cu sa cu tin hopi problema, sa caba kico ta e factornan cu ta conduci na eseynan y un di nan sa sigur cu na momento cu construi un proyecto asina, bo mester por construy’e practicamente completo, cu su infrastructura, cu su bon camindanan, cu su aceranan y construccion di e vivienda mes, un bon arkitectura pa por evita e tipo di problemanan ey y tambe ponemento di veldnan cu muchanan por recrea, espacionan pa recrea, espacionan pa haci ehercicio, ta hopi importante. A bin mira cu esey a disminui hopi e problemanan cu por tabata tin den bario. Hopi biaha e barionan tin mucha y hobennan cu si no tin nada pa recrea, nan ta cuminsa haci fastioso of cuminsa sinti fastioso, nada di haci y nan ta busca coy haci. Si pone algo asina pa nan, espacionan pa recrea, bo ta evita hopi di e tipo di problemanan cu tabata tin den pasado y tin e experiencia na un paar di bario cu a pone veld di hunga futbol, parke di recreo pa muchanan mas chikito cu tin e aparatonan pa nan hunga, aparatonan pa haci ehercicio pa hendenan mas grandi y nan por cana rond di e veld, keda den movecion. E ta hopi importante y e ta resultando hopi exitoso, segun Leest.
E bario tambe ta cuida su mesun cosnan, pasobra ta motivanan cu esaki ta un inversion grandi, pero ta pa nan propio uzo y berdad ta mira cu e ta wordo uza hopi mes. Si pasa den e barionan unda cu a pone ultimo tempo e veldnan di bala, muchanan no kier bay cas mes. El a resulta hopi bon, segun Leest.